વેરા વસુલાત:ગોધરા પાલિકાની 35 દુકાનદારને નોટિસ છતાં તેઓ ભાડું ભરતા નથી

ગોધરા નગરપાલિકાની મુખ્ય આવક મિલ્કત વેરાની હોય છે. અગાઉની પાલિકાએ ગત વર્ષે ફક્ત 46 ટકા જેટલી રકમની વસૂલાત કરવામાં આવી હતી.હાલ ગોધરા નગરપાલિકાના પ્રમુખ સંજય સોનીના હાથમાં પાલિકાનો કારભાર આવતાં પાલિકાની ગોધરા શહેરમાંથી વેરાના બાકી પેટે રૂપિયા 10.66 કરોડ રકમની ઉઘરાણી બાકી બોલે છે. જેમાં અગાઉના વર્ષના 7.53 કરોડ અને ચાલુ વર્ષના 3.12 મળીને કુલ રૂપિયા 10.66 કરોડના વેરા વસૂલાત બાકી નીકળતાં પાલિકા પ્રમુખે શહેરીજનોને વહેલી તકે ઘર વેરો ભરવાની અપીલ કરવામાં આવી હતી.

જ્યારે ગોધરા નગરમાં પાલિકાના દ્વારા અલગ અલગ શોપિંગ સેન્ટરમાં કુલ 715 જેટલી દુકાનો આવેલી છે. જે તે સમયે પાલિકાએ દુકાનો ભાડે આપી હતી અને દુકાનદારો પાસેથી પાલિકા નજીવા રૂપિયા 300થી લઇને રૂપિયા 900 જેટલું ભાડું વસૂલે છે. આટલું નજીવું ભાડું હોવા છતાં પાલિકાની માલિકીની દુકાનના દુકાનદારો પાલિકાને ભાડું ચુકવતા નથી. જેને લઇને પાલિકા દ્વારા 5 હજારથી વધુ ભાડું ચઢી ગયું હોય તેવા 35 દુકાનોના ભાડુઆતોને ભાડું ત્રણ દિવસમાં ભરી જાવ નહિ તો કાર્યવાહી કરવાની નોટિસ આપવા આવી હોવા છતાં દુકાનદારો નગર પાલિકામાં ભાડાની રકમ જમા જ કરાવતા નથી.