અકસ્માત:બાસ્કા પાસે એક સાથે 5 વાહનો વચ્ચે વિચિત્ર અકસ્માત સર્જાયો

હાલોલ વડોદરા હાઇવે રોડ પર બાસ્કા ગામ નજીક પોલિકેબ કંપની સામે મુખ્ય રોડ પર રવિવારે બે એસ.ટી બસો, બે કાર અને એક આઈસર ટેમ્પો એમ એક સાથે પાંચ વાહનો વચ્ચે વિચિત્ર અકસ્માત સર્જાયો હતો. સદનસીબે કોઈ જાનહાનિ ન થવા પામતા મોટી દુર્ઘટના બનતા અટકી જવા પામી હતી. વડોદરાથી હાલોલ તરફ આવતી સરકારી બસ આવી રહી હતી. દરમિયાન મુખ્ય રોડ પર એક ટ્રેલર બ્રેકડાઉન ઊભેલું હતું. પરંતુ રોડ ટોલ રોડ દ્વારા કોઈ સંકેત ન મુક્યુ હોય બસ ચાલકે એકાએક પોતાની બસને બ્રેક મારતા બસ અચાનક ઉભિ થઈ જતા પાછળ ચાલતી એક મારુતિ કાર તેની પાછળ અથડાઈ હતી. જ્યારે તેની પાછળ ચાલતી વધુ એક અલ્ટો કાર બ્રેઝા કારની પાછળ અથડાઇ હતી.

જ્યારે અલ્ટો કારની પાછળ ચાલતો એક આઈસર ટેમ્પો તેની પાછળ અથડાતા ટેમ્પાની પાછળ ચાલતી એક બસ આઇસર ટેમ્પો પાછળ અથડાઈ હતી. જેને લઈ પાંચ વાહનો વચ્ચે અકસ્માત સર્જાયો હતો. એક બીજાની પાછળ વાહનો અથડાઈ વચ્ચોવચ ફસાઈ જવા છતા કોઈપણ વ્યક્તિને કોઈપણ જાતની ઇજા પહોંચી ન હતી જેને લઇને મોટી દુર્ઘટના થતી અટકી જવા પામી હતી. એક સાથે પાંચ વાહનો મુખ્ય રોડ પર અથડાતા હાઈવે રોડ પર ટ્રાફિક જામ થઇ જવા પામ્યો હતો.

અકસ્માતની જાણ થતા મોટી સંખ્યામાં લોકો ઘટના સ્થળે ઉમટયા હતા.બનાવ અંગેની જાણ તાત્કાલિક હાલોલ રૂરલ પોલીસને થતા પોલીસ ટીમ તાત્કાલિક ઘટનાસ્થળે દોડી આવી હતી. સ્થળ પરથી ટ્રાફિક જામ છૂટો કરી અકસ્માત થયેલ વાહનોને હટાવવાની કામગીરી હાથ ધરી હતી. જોકે આ અકસ્માતમાં તમામ પાંચેય વાહનોને નાનું મોટું નુકસાન થવા પામ્યું છે.