દુર્ઘટના:હાલોલ ટોલનાકા પાસે અજાણ્યા વાહનની ટક્કરે આવતાં 2ના મોત, અકસ્માત સ્થળે બિયરના ટીન હોવાનો વીડિયો વાયરલ

હાલોલ તાલુકાના આનંદપુરા ગામે રહેતાે મનોજ પરમાર ઉંમર વર્ષ 22 અને તેનો મિત્ર અશ્વિન પરમાર ઉં.28 આનંદપુરા ગામેથી બાઈક પર હાલોલ આવી રહ્યા હતા. દરમિયાન ટોલનાકા પાસે કોઈ અજાણ્યા વાહને બાઈકને ટક્કર મારતા બાઈક સહિત યુવાનો રોડ પર ફંગોળાઈ જતા બંનેને ગંભીર ઈજાઓ પહોંચી હતી.

જેમાં ઇજાગ્રસ્ત અશ્વિનનું ઘટના સ્થળે જ મોત નીપજ્યું હતું. જ્યારે મનોજને હાલોલ રેફરલ હોસ્પિટલમાં લવાયો હતો પણ તેને સારવાર મળે તે પહેલા જ તેનું પણ મોત નિપજતા આનંદપુરામાં શોક છવાયો હતો. મૃતક અશ્વિનને બે સંતાનો છે. જ્યારે મનોજ ત્રણ બહેનો પર એકનો એક ભાઈ હતો. પોલીસે અજાણ્યા વાહન વિરુદ્ધ ગુનો નોંધી અકસ્માત સર્જી ભાગી છૂટેલા વાહનને ઝડપી પાડવા નજીકના ટોલનાકાના સીસીટીવી ફૂટેજ મેળવવાની તજવીજ હાથ ધરી છે.

અકસ્માત સ્થળના ફોટા વીડિયો ગણતરીના સમયમાં સોશિયલ મીડિયામાં વાયરલ થયા હતા. જેમાં એક વીડિયોમાં અકસ્માત સ્થળે બિયરના ટીન પડેલા હોવાનું સ્પષ્ટ થયું હતું પણ પોલીસ ફરિયાદમાં બિયરના ટીન અંગે કોઈ ઉલ્લેખ કરાયો ન હોવાનું જાણવા મળે છે.