હાલાકી:ઘોઘંબાથી કાંટુના રસ્તા પર નાળાની તકલાદી કામગીરીથી ગાબડાં પડ્યાં

ઘોઘંબાથી કાંટુ તરફ જતો મુખ્ય રસ્તો દેવગઢ બારીયા, ભીખાપુરા, સાગટાળા સહિત નાનાં મોટાં ગામોમાં આવવાં જવા માટે અા રસ્તો રાત-દિવસ અેસટી સહિત અન્ય વાહનોથી સતત ધમધતો રહે છે. સાથે આ વિસ્તારના ગામોના ગ્રામજનો માટે આ રસ્તો ખૂબ સીધો છે. ત્યારે આ રસ્તામાં નાનાં-મોટાં ખાડા પડતાં આ રસ્તો કેટલીક જગ્યાએ બિસ્માર હાલતમાં ફેરવાઈ ગયો છે. રસ્તાની કામગીરી બે વર્ષ પહેલાં જ થઈ પૂર્ણ થઈ હતી.

પરંતુ તકલાદી કામગીરીના કારણે જુના દાવોદ્રા ગામની હદમાં હરિજનવાસ પાસે નાળાની બંને બાજુએ માટીનું ધોવાણ થતાં મુખ્ય માર્ગ નીચે દિવસેને દિવસે ખૂબ ઉંડો ભુવો પડતો જાય છે. જો અા ભુવો (ગાબડા)ની રીપેરીંગની કામગીરી વહેલી તકે હાથ ધરવામાં નહિ આવે તો આવતાં સમયમાં કોઈ મોટી દુર્ઘટના સર્જાય શકે છે. જેમા જાનમાલનું નુકશાન થવાની પુરેપુરી સંભવના રહેલી છે.