કોરોના મહામારી:ઘોઘંબા તાલુકામાં સરકારી ચોપડે 2 કોરોના કેસની સામે સંક્રમિતોની સંખ્યા 10થી વઘુ

ધોઘંબા તાલુકામાં દિનપ્રતિદિન કોરોનાના કેસોની સંખ્યામાં ઉત્તરોત્તર વધારો થતો જાય છે. તાલુકામાં કોરોના પોઝીટીવ કેસનો આંકડો વધારે હોવા છતાં ધોઘંબા બ્લોક હેલ્થ કચેરી ખાતે કોરોના દર્દીના બીલકુલ નહીવત આંકડા બતાવાય છે. સરકારી આંકડા મુજબ તાલુકામાં કોરોનાના બે જ કેસ છે. જયારે ઘોઘંબામાંજ 10થી વઘુ કોરોના દર્દીઓ હોવાની ચર્ચાઓ વચ્ચે કોરોના આંકડા છુપાવી રહ્યા છે.

તાલુકામાં રોજના 250 જેટલા કોરોના ટેસ્ટ કરાય. તાલુકા હેલ્થ કચેરી ખાતે સ્ટાફ ઓછો હોવાથી કોરોનાની લડાઇ ઘીમી પડી રહી છે. તાલુકામાં કોરોના સંક્રમણ વધારે હોવાથી કોરોના દર્દીઓને તાજપુરા કે વડોદરા જઇને સારવાર માટે મોકલી દેવાય છે. તાજેતરમાં ઘોઘંબામાં ચાર પરિવારના 20 જેટલા વ્યક્તીઓ કોરોના પોઝીટીવ હોવા છતાં સરકારી આંકડામાંથી ગાયબ થયાની ચર્ચાઓ થઇ હતી.

આમ ઘોઘંબા તાલુકામાં કોરોનાનું સંક્રમણ વધી રહ્યું છે. તો સોશિયલ ડિસ્ટન્સ અને માસ્ક ફરજીયાત પહેરવું જોઇએ તેમ છતાં કેટલાક બેજવાબદાર લોકો માસ્ક વગર ફરીને કોરોનાને આંમત્રણ આપી રહ્યા હોય તેમ લાગી રહ્યું છે.