કામગીરી:રોડ બનાવવા જમીન સંપાદનને લઈ ખેડૂતનું મકાન પાડી નાંખ્યાના કેસમાં હવે ફરિયાદ દાખલ થશે

કોડીનારના મજેવડી હનુમાન મંદિર સામે માનસિંહભાઈ કાનાભાઈ મોરી વર્ષોથી પરિવાર સાથે રહે છે. નેશનલ હાઇવેનાં અધિકારીઓ દ્વારા વધારાની બિન સંપાદિત જમીન આ રોડમા આપવા માનસિંહભાઈ મોરીને ટોરચર કરાતુ હતું. જેથી માનસિંગભાઈએ આ બાબતે પ્રાંત અધિકારીને રજૂઆત કરી હતી. અને પ્રાંત અધિકારીએ પણ રજૂઆત સાંભળી વધારાની જમીનની સંપાદન વિધિ અને વળતર ચૂકવ્યા બાદ જ આ આ મકાન અને જમીનમાં પ્રવેશ કરવા આદેશ આપ્યો હતો. છતાં 12 જૂન 2021નાં રોજ સવારના 9 વાગ્યે નેશનલ હાઇવેનાં અધિકારીઓ, પોલીસ, કોડીનાર મામલતદાર, જેસીબી સાથે મકાન પાડવાની શરૂઆત કરી તો માનસિંહભાઈના પરિવારજનોએ વિરોધ કર્યો હતો. પણ તેમની વાત કોઈએ ગણકારી ન હતી.

મકાનમાં ઘરવખરી ભરી હોવાનું જણાવતા તેઓએ આ તમામ સામાન પણ ભરી લીધો હતો. જેની કિંમત અંદાજે છ લાખ જણાવાઈ છે જે પણ ભરી ગયા હતા. આ રીતે સામાનની લૂંટ કરી ગયા હતા. અને હાલ આ ઘર વખરી, સામાન ક્યાં છે ? તેની કોઈ માહિતી મળી નથી. બાદ આ બાબતે ફરિયાદ દાખલ કરવા અવારનવાર અરજીઓ કરાઈ હતી. પણ કોઈ કાર્યવાહી ન કરાતા કોડીનાર કોર્ટમાં દાદ માંગી હતી. બાદ 27 ફેબ્રુ. 2023નાં રોજ કોડીનાર કોર્ટે ફરિયાદ લઈ તપાસ કરવા કોડીનાર પોલીસને હુકમ કર્યો હતો.