અપક્ષ ધારાસભ્ય:ચૂંટાયેલા ત્રણ અપક્ષ ધારાસભ્ય ભાજપમાં જોડાય તેવી શક્યતા

ગુજરાત વિધાનસભાની ચૂંટણીમાં પોતાની તાકાતથી ચૂંટાયેલા ત્રણ અપક્ષ ધારાસભ્યોએ હવે કોઇ રાજકીય પાર્ટીમાં જોડાવા માટેની વાટાઘાટો હાથ ધરી છે. સૂત્રોના કહ્યા મુજબ, ત્રણેય ધારાસભ્યો ભાજપમાં જોડાઇ શકે છે. આ બાબતે સોમવારે ચિત્ર સ્પષ્ટ થાય તેવી શક્યતા છે.

વિધાનસભાની ચૂંટણીના તાજેતરમાં આવેલા પરિણામો પ્રમાણે બાયડથી ધવલસિંહ ઝાલા, વાઘોડિયાથી ધર્મેન્દ્ર જાડેજા અને ધાનેરાથી માવજી દેસાઇએ વિધાનસભાની ચૂંટણીમાં જીત મેળવી હતી. આ ત્રણેય ધારાસભ્યો અપક્ષ તરીકે ચૂંટાયા પછી તેમને કોઇ રાજકીય પક્ષમાં જોડાવવાની જરૂરિયાત સમજાઇ હતી. આથી ત્રણેય ધારાસભ્યોએ ખાનગીમાં એક બેઠક યોજી હતી. આ બેઠકમાં ત્રણેય ધારાસભ્યોએ કોઇ રાજકીય પાર્ટીમાં જોડાવાનું નક્કી કર્યું હતું.

સૂત્રોના કહ્યા પ્રમાણે મોટાભાગે ત્રણેય ધારાસભ્યો ભાજપમાં જોડાઇ તેવી પૂરી શકયતા છે. આ બાબતે ભાજપના સંપર્કમાં પણ ત્રણેય ધારાસભ્યો હોવાનું બહાર આવ્યું છે. ધારાસભ્ય તરીકેના શપથ ગ્રહણ કરે તે પહેલા આ ત્રણેય ધારાસભ્યો ભાજપમાં જોડાશે તેમ સૂત્રોનું કહેવું છે. જો કે, આ બાબતે હજુ કોઇ ચિત્ર સ્પષ્ટ થયું નથી,પરંતુ ત્રણેય ધારાસભ્યો ભાજપમાં કયારે જોડાશે તે બાબતનું ચિત્ર એકાદ-બે દિવસમાં સ્પષ્ટ થાય તેવી શકયતા છે.