કાર્યવાહી:કટરથી હુમલો કરી ફોન લૂંટનારા શખ્સને રિક્ષાચાલકે ઝડપી પાડ્યો

જમીયતપુર ખાતે રિક્ષા ચાલકના ગળા પર કટર મુકીને ફોનની લૂંટ કરનાર ઝડપાયો હતો. આરોપીએ શેરથા પાસે અન્ય એક વ્યક્તિ પાસેથી પણ લૂંટનો પ્રયત્ન કર્યો હતો જેની મદદથી રિક્ષા ચાલકે આરોપીને ઝડપીને પોલીસને સોંપ્યો હતો.

ચાંદલોડીયા રહેતાં ધર્મેન્દ્રભાઈ સોનીએ અડાલજ પોલીસમાં નોંધાવેલી ફરિયાદ મુજબ તેઓ મંગળવારે રાત્રે અમદાવાદથી કલોલની વર્ધી લઈને ગયા હતા. પરત કલોલથી એક પેસેન્જર મળ્યો હતો જેણે ત્રી મંદિર ઉતારવા કહ્યું હતું. પેસેન્જરે રિક્ષા ચાલકના ગળા પર કટર મૂકતા તેઓએ રિક્ષા ઉભી રાખી હતી, શખ્સે ફોન માંગતા રિક્ષાચાલકે ના પાડતા તેણે કટરથી તેમને ગળા અને મોઢા પર ઈજાઓ કરી ફોન લઈને ભાગી ગયો હતો. રિક્ષાચાલકે ત્રી મંદિર પાસે આવી અન્ય લોકોને જાણ કરી હતી.

રિક્ષા સ્ટેન્ડ પર ધર્મેન્દ્રભાઈને શેરથાનો સુનિલ ઠાકોર મળતા તેણે જણાવ્યું કે, તે કલોલ પેટ્રોલપંપથી નોકરી પૂરી કરી આવતો હતો ત્યારે અજાણ્યા શખ્સે તેની રિક્ષામાં બેસાડી ગળા પર છરી જેવું હથિયાર મુકી પૈસા અને ફોન માગતા સુનિલ ચાલુ રિક્ષામાંથી ભાગી આવ્યો હતો. ફરિયાદી ધર્મેન્દ્ર સોની અને સુનિલે આસપાસના વિસ્તારમાં શોધખોળ કરતાં આરોપી પકડાતા જેને પોલીસ સ્ટેશન લઈ જઈને તે કલોલનો રાહુલ ગોપાલભાઈ પટણી હોવાનું ખૂલ્યુ હતું.