ભાસ્કર એક્સક્લૂઝિવ:કોરોનાને કારણે પરીક્ષા 20 દિવસ મોડી લેવાઈ હતી, પરંતુ ધોરણ 10 અને 12 સામાન્ય પ્રવાહનું રિઝલ્ટ વહેલું જાહેર કરવા બોર્ડની તૈયારી

ગાંધીનગરએક મહિનો પહેલાલેખક: હિતેષ જયસ્વાલ
  • કૉપી લિંક
ફાઇલ તસવીર - Divya Bhaskar
ફાઇલ તસવીર
  • મેના અંતમાં કે જૂનના પહેલા સપ્તાહમાં પરિણામ જાહેર કરવા મૂલ્યાંકન કેન્દ્ર, શિક્ષકોની સંખ્યા વધારાઈ

શિક્ષણ બોર્ડ દ્વારા આ વર્ષે ધોરણ 10 અને 12ની પરીક્ષા નિયત સમય કરતાં 20 દિવસ મોડી લેવાઈ હતી, ત્યારે બાકી રહેલું ધોરણ 10 અને 12 સામાન્ય પ્રવાહનું પરિણામ નિયત સમય કરતાં સપ્તાહ વહેલું આપવાનો શિક્ષણ બોર્ડે નિર્ણય કર્યો છે અને આ માટે માઇક્રો પ્લાનિંગ કર્યું છે. તેમાં ઉત્તરવહીના મૂલ્યાંકનની કામગીરીથી માંડીને પરિણામ તૈયાર કરવા સુધીનું આયોજન કરાયું છે.

શિક્ષણ બોર્ડે કોરોનાકાળને પગલે બોર્ડની પરીક્ષા મોડી યોજી હતી. જોકે ધોરણ 12 સાયન્સનું પરિણામ વહેલું અપાયું હતું, તે જ રીતે ધોરણ 10 અને 12 સામાન્ય પ્રવાહનું પરિણામ પણ વહેલું આપવાનું બોર્ડનું આયોજન છે. મહત્ત્વનું છે કે મે મહિનાના છેલ્લા અથવા જૂન મહિનાના પહેલા સપ્તાહમાં પરિણામ આવે તેવી શક્યતા છે.

ધોરણ 10ના 9.64 લાખ વિદ્યાર્થીઓનાં ઉત્તરવહી મૂલ્યાંકન માટે કેન્દ્ર વધારાયાં

  • ઉત્તરવહી મૂલ્યાંકન માટે ગત વર્ષે 164ની સામે આ વર્ષે 175 એટલે કે 11 કેન્દ્ર વધાર્યાં.
  • મોટા જિલ્લાઓમાં ક્લસ્ટર બનાવીને શિક્ષકોને ઉત્તરવહીના મૂલ્યાંકનનું સેન્ટર નજીક પડે તેવી વ્યવસ્થા કરી હતી. ઉપરાંત એક સેન્ટર ઉપર 40 હજારને બદલે 30 હજાર ઉત્તરવહી આપી.
  • 24 હજાર શિક્ષકને ઉત્તરવહી મૂલ્યાંકનની કામગીરી સોંપાઈ. એક વિદ્યાર્થીના 7 વિષય લેખે કુલ 6,75,1703 ઉત્તરવહી થાય છે.
  • માર્ક્સના વેરિફિકેશન માટે વ્યક્તિગત વેરિફિકેશનની વ્યવસ્થા તેમજ ડેટા એન્ટ્રી સહિતની કામગીરી માટે 200 જેટલા કર્મચારી રોક્યા.

12 સામાન્ય પ્રવાહના વિદ્યાર્થીઓના મૂલ્યાંકન માટે 30 હજાર શિક્ષકો

  • 4.50 લાખ વિદ્યાર્થીની 7 વિષય લેખે કુલ 3150000 ઉત્તરવહી
  • ડાંગ સિવાય તમામ જિલ્લાઓમાં મૂલ્યાંકન કેન્દ્રો ઊભાં કરાયાં.
  • મધ્યસ્થ મૂલ્યાંકન કેન્દ્ર ખાતે અગાઉ માત્ર 2 વિષયની ઉત્તરવહી આપવામાં આવી પણ આ વર્ષે 3થી 5 વિષયની ઉત્તરવહી આપવામાં આવી હતી.
  • જિલ્લાઓમાં ક્લસ્ટર બનાવીને મુખ્ય અને ગૌણ વિષયની મૂલ્યાંકન કામગીરી એક જ સેન્ટર ઉપર રખાઈ હતી. જોકે દર વર્ષે મૂલ્યાંકનની કામગીરી 13 જેટલા જિલ્લામાં નહોતી અપાતી.
  • સરકારી, ગ્રાન્ટેડ અને ખાનગી શાળાઓના 30 હજાર શિક્ષકોને મધ્યસ્થ મૂલ્યાંકનની કામગીરી સોંપાઈ હતી.

મૂલ્યાંકન માટે દૂર જવું ન પડે તે માટે ક્લસ્ટર બનાવ્યાં
મધ્યસ્થ મૂલ્યાંકનની કામગીરીમાં ભાગ લેનારા શિક્ષકોને મુખ્ય અને ગૌણ વિષયની ઉત્તરવહી મૂલ્યાંકન માટે અલગ અલગ જિલ્લાના મધ્યસ્થ મૂલ્યાંકન કેન્દ્રોમાં જવું પડતું હતું. આથી દૂર કે અન્ય જિલ્લામાં જવું ન પડે તે માટે દરેક જિલ્લામાં ક્લસ્ટર બનાવાયાં હતાં, જ્યાં મુખ્ય અને ગૌણ વિષય સહિતના અન્ય વિષયોની ઉત્તરવહી મૂલ્યાંકન માટેની વ્યવસ્થા ઊભી કરાઈ હતી.

વહેલું પરિણામ તૈયાર કરવામાં આવેલી અડચણો
શિક્ષણ બોર્ડે વહેલું પરિણામ આપવા માટે આયોજન કર્યું છે પરંતુ તેમાં કેટલીક અડચણો આવી હતી, જેમ કે શિક્ષકોનું આંદોલન, ધોરણ 9 અને 11ની વાર્ષિક પરીક્ષા, ગૌણસેવા સહિતની સ્પર્ધાત્મક પરીક્ષાઓને લીધી મૂલ્યાંકન કામગીરી બંધ રાખવી પડી હોવાનું શિક્ષણ બોર્ડના ધોરણ 10ના પરીક્ષા સચિવ બી. એ. ચૌધરી અને ધોરણ 12 સામાન્ય પ્રવાહના પરીક્ષા સચિવ ડૉ. અવનીબા મોરીએ જણાવ્યું હતું.

અન્ય સમાચારો પણ છે...