પાણીની લાઇન લિકેજ:જૂનાં સેક્ટરોના રહીશોને આજે ધીમા ફોર્સથી પાણી મળશે

શહેરના જૂના સેક્ટર્સ એટલે સે-16થી 30માં રવિવારે ધીમા ફોર્સથી પાણી આવે તેવી શક્યતા છે, જેના કારણે આ વિસ્તારના રહીશોને હાલાકી ભોગવવી પડશે. શહેરના જૂના વિસ્તારોમાં પાણીનો પુરવઠો પૂરો પાડતા ચરેડી વોટર વર્ક્સમાંથી પાણીની મેઇન લાઇનના ફ્લેન્જનું રબરનું પૅકિંગ તૂટી ગયું હતું. જેનું સમારકામ ચાલુ કરાયું છે. આ કારણે રવિવારે સેક્ટર-16થી 30માં ઓછા દબાણથી પાણી આવી શકે છે.

ગાંધીનગરની રચના થઈ ત્યારે વસાહતીઓને પાણી પૂરું પાડવા માટે ચરેડી ખાતે પાણીની ટાંકી બનાવવામાં આવી હતી. જેના થકી જ શહેરમાં પાણી પહોંચાડવામાં આવતું હતું. ત્યાર બાદ પાણીની બુમો પડતાં સે-5 અને સરીતા ઉદ્યાન ખાતે પાણીની ટાંકી બનાવીને નવાં સેકટરોમાં પૂરતા પ્રેશરથી પાણી પહોંચાડાય છે.