કૃષિ:જિલ્લામાં ટેકાના ભાવે મગફળીનું વેચાણ ન થતાં રજિસ્ટ્રેશનવાળા ખેડૂતો ચિંતિત

ગાંધીનગર11 દિવસ પહેલા
  • કૉપી લિંક
  • મજૂરો ન મળવાથી ટેકાના ભાવે મગફળીની ખરીદી શરૂ કરાતી નથી
  • ગાંધીનગર જિલ્લાના કુલ 5593 ખેડૂતોમાંથી 1430 ધરતીપુત્રોએ ટેકાના ભાવે મગફળીનું વેચાણ કરવા માટે રસ દાખવ્યો હતો

ગાંધીનગર જિલ્લાના 1430 ખેડૂતોએ મગફળીને ટેકાના ભાવે વેચાણ કરવા ઓનલાઇન રજિસ્ટ્રેશન કરાવ્યું છે. છતાં હજુ સુધી તંત્રને મજૂરો નહી મળતા ટેકાના ભાવે મગફળીની ખરીદી શરૂ નહી થતા ટેકાના ભાવે મગફળીના વેચાણ માટે રાહ જોતા ખેડૂતોની નિંદર હરામ બની છે. ગત 9 નવેમ્બર-2021ના રોજ ટેકાના ભાવે મગફળીની ખરીદી કરવાની હતી.

ચાલુ વર્ષે સરકારે ટેકાના ભાવે મગફળીની ખરીદી કરવાની જાહેરાત કરી છે. ઉપરાંત ટેકાનો ભાવ પ્રતિ 20 કિલોનો રૂપિયા 1100 પણ નક્કી કરીને તેને પ્રસિદ્ધ કરવામાં આવ્યો છે. ઉપરાંત રાજ્યનના પુરવઠા વિભાગે ટેકાના ભાવે મગફળીનું વેચાણ કરવા ઇચ્છતા ખેડુતોનું ઓનલાઇન રજિસ્ટ્રેશન શરૂ કરવામાં આવ્યું હતું. જોકે એકપણ ખેડુત રજિસ્ટ્રેશન વિના બાકાત રહે નહી તે માટે ઓનલાઇન રજિસ્ટ્રેશનની મુદતમાં વધારો કરવામાં આવતા જિલ્લાના કુલ 5593 ખેડુતોમાંથી 1430 ધરતીપુત્રોએ ટેકાના ભાવે મગફળીના વેચાણ માટે રસ દાખવ્યો હતો. જોકે જિલ્લાના કુલ ખેડુતોમાંથી માત્ર 25.56 ટકા ખેડુતોએ ટેકાના ભાવે મગફળી વેચાણ માટે રસ દાખવ્યો છે.

ટેકાના ભાવે મગફળીના ખરીદી માટે દહેગામ અને માણસા તાલુકાના માર્કેટયાર્ડમાં જ્યારે ગાંધીનગર તાલુકામાં પેથાપુર ખાતેના પુરવઠા ગોડાઉનમાં ખરીદી કરવામાં આવશે તેવી જાહેરાત થઈ હતી. જોકે ટેકાના ભાવે મગફળીના વેચાણ માટે રજિસ્ટ્રેશન કરવા છતાં હજુ સુધી જિલ્લાના એકપણ ખેડુતોના મોબાઇલમાં મેસેજ નહી આવતા ધરતીપૂત્રોની નિંદર હરામ બની છે.

કેમ કે હાલમાં રવી સીઝનના પાકની વાવેતરનો સમય હોવાથી જો મગફળીને વેચાણ કરીએ તો નવું બિયારણની ખરીદી કરીને વાવેતર કરી શકીએ તેમ જિલ્લાના ખેડૂતોએ જણાવ્યું છે. જોકે ઓનલાઇન નોંધણી કરાવેલા ખેડુતોને ટેકાના ભાવે મગફળી ખરીદીનો મેસેજ નહી આવતા આથી અંદાજે 80 ટકા જેટલા ખેડુતોએ મગફળીને બજારમાં વેચી મારી હોવાનું ખેડુતોએ જણાવ્યું છે.

અન્ય સમાચારો પણ છે...