ફિલ્મીઢબે પોલીસે બુટલેગરોને ઝડપ્યા:બનાસકાંઠાથી કારમાં દારૂનો જથ્થો ભરીને કોબા તરફ જતાં બે શખસોને પોલીસે ફિલ્મી ઢબે ઘૂંઘટ હોટલ પાસેથી ઝડપ્યા

ગાંધીનગર19 દિવસ પહેલા
  • કૉપી લિંક

ગાંધીનગરની સ્થાનિક ગુના નિવારણ શાખાની ટીમે ગઈકાલે રાત્રે પૂર્વ બાતમીના આધારે ઘૂંઘટ હોટલ પાસેના રેલવે ફાટક નજીક વોચ ગોઠવીને બ્રેઝા કારમાં બનાસકાંઠાથી વિદેશી દારૂનો જથ્થો ભરીને કોબા ડીલીવરી આપવા નીકળેલા બે ઈસમોને ફિલ્મી ઢબે દોટ લગાવી ઝડપી લઈ 912 નંગ દારૃની બોટલો સહિત રૂ. 6.05 લાખનો મુદામાલ જપ્ત કરી કાનૂની કાર્યવાહી હાથ ધરવામાં આવી છે.

વિદેશી દારૃના નેટવર્ક શોધવા એલસીબી સક્રિય
રાજ્યના પાટનગરમાં દારૂની હેરફેરના દૂષણને ડામી દેવા જિલ્લા પોલીસ વડા તરુણ દુગ્ગલની સૂચનાથી ગાંધીનગર સ્થાનિક ગુના નિવારણ શાખા-2નાં ઈન્સ્પેક્ટર એચ. ક્યું. પરમાર, જે એચ સિંધવની ટીમે રાજસ્થાન તરફથી ગાંધીનગરમાં ઠલવાતો વિદેશી દારૃના નેટવર્ક સુધી પહોંચવા બાતમીદારોને સક્રિય કરી રાત્રિ દરમ્યાન પેટ્રોલિંગ વધારી દેવાયું છે. ત્યારે ગઈકાલે એલસીબીની ટીમને બાતમી મળી હતી કે, બનાસકાંઠાથી કારમાં દારૂનો જથ્થો લઈને બે ઈસમો કોબા ખાતે ડીલીવરી કરવા માટે નીકળ્યા છે. જે પાલનપુરથી ક - 7 ઘૂંઘટ હોટલ તરફથી શહેરમાં પ્રવેશી કોબા જવાના છે.

કાર મૂકીને બે ઈસમો રેલવે ટ્રેક તરફ ભાગવા લાગ્યા હતા
બાતમીના આધારે એલસીબીની ટીમે રેલવે ફાટક નજીક ખાનગી વાહનની આડશ કરીને વોચ ગોઠવી હતી. ત્યારે અંધારામાં દૂરથી પોલીસ ટીમ વોચમાં ઉભી હોવાનો અંદાજ આવી જતાં બાતમી વાળી કાર રેલવે ફાટક પાસે રોકાઈ ગઈ હતી. જેમાથી બે ઈસમો ઉતરીને રેલવે ટ્રેક તરફ ભાગવા લાગ્યા હતા.

ફિલ્મી ઢબે દોટ લગાવીને બન્ને ઈસમોને ઝડપી પાડ્યા
આથી અગાઉથી તૈયારી સાથે ઉભેલી ટીમે ફિલ્મી ઢબે દોટ લગાવીને બંનેને થોડેક આગળ જઈને પકડી પાડ્યા હતા. જેમની પૂછતાંછમાં તેમણે પોતાના નામ તુલસીરામ માનારામજી ડાંગી(રહે. નઉવા ગામ, તા, માવલી, ઉદેપુર, રાજસ્થાન) અને વરદીચંદ તુલી ડાંગી હોવાનું કહી કોબા ખાતે પહોંચી 7802062119 નંબરના મોબાઇલ પર ફોન કરીને તે ઈસમને આ દારૂ ભરેલી કાર આપવાની હોવાની કબૂલાત કરી હતી.

કુલ રૂ. 6.05 લાખનો મુદામાલ જપ્ત
બાદમાં પોલીસે કારની તલાશી લેતાં ગાડીની પાછળની સીટમાં ભારતીય બનાવટની વિદેશી દારૂની પેટીઓમાં ભરેલ દારૂની 911 બોટલોનો જથ્થો મળી આવ્યો હતો. આથી પોલીસે દારૂ, મોબાઈલ ફોન તેમજ કાર મળીને કુલ રૂ. 6.05 લાખનો મુદામાલ જપ્ત કરી કાનૂની કાર્યવાહી કરી પેથાપુર પોલીસ મથકમાં ગુનો દાખલ કરાવ્યો છે.

અન્ય સમાચારો પણ છે...