સુધારાની વકી:મનપાના બજેટ મુદ્દે આજે સ્થાયી સમિતિની બેઠક, કમિનશરે રજૂ કરેલાં બજેટમાં ચૂંટણીલક્ષી સુધારાની સંભાવના

ગાંધીનગર કોર્પોરેશનું વર્ષ 2021-22 માટેનું ડ્રાફ્ટ બજેટ મ્યુનિસિપલ કમિશનરે 22મી જાન્યુઆરીના રોજ સ્થાયી સમિતિમાં રજૂ કર્યું હતું. કોઈપણ નવા કર વગરના 345.20 કરોડના બજેટમાં 33.19 કરોડની પૂરાંત દર્શાવાઈ છે. ત્યારે સ્થાયી સમિતિની આજની બેઠકમાં તેને આખરી ઓપ આપવામાં આવશે.

ડ્રાફ્ટ બજેટમાં નવા વિસ્તારો માટે 81 કરોડ રસ્તા, પાણી, કમ્યુનિટી હોલ, તળાવ, બગીચા, ગટર વ્યવસ્થા, સ્ટ્રીટ લાઈટ વગેરે માટે ફાળવવામાં આવ્યા છે. ત્યારે આગામી ચૂંટણીને ધ્યાને લઈને સ્થાયી સમિતિ દ્વારા બજેટમાં સુધારા-વધારા કરાય તેવી શક્યતા છે. જેમાં પ્રજા સાથે કાઉન્સિલર્સની ગ્રાન્ટમાંથી ખરીદીની વસ્તુઓનો વ્યાપ વધારાય તેવી શક્યતા છે. ઉલ્લેખનીય છે કે, વર્ષ 2020-21નું રીવાઈઝ અંદાજપત્ર 278.37 કરોડનું છે. જ્યારે વિસ્તારમાં બમણા વધારા બાદ રજૂ થયેલા બજેટનું કદ 345.20 કરોડ છે.

આમ, વિસ્તારમાં બમણા વધારા બાદ બજેટમાં 65 કરોડનો વધારો થયો છે. ત્યારે વિસ્તારની દૃષ્ટિએ બજેટમાં નજીવો વધારો થયો છે ત્યારે નવા કરભારણ વગર પ્રજાલક્ષી સુવિધાઓ માટે ખર્ચ વધારવાનો પડકાર સ્થાયી સમિતી સમક્ષ છે.ત્યારે સ્થાયી સમિતિની બેઠકમાં કેવી ચર્ચા થાય છે તેના પર આધાર રહેલો છે.