ભાજપની જીત:27 વર્ષ પછી જિલ્લાની તમામ 5 બેઠકો પર કમળ

ગુજરાત વિધાનસભા ચૂંટણીના જાહેર થયેલા પરિણામમાં જિલ્લાની પાંચેય બેઠક કમળ ખીલ્યું છે. ભાજપે ગાંધીનગર દક્ષિણ અને દહેગામ બેઠક જાળવી રાખીને કોંગ્રેસના પંજામાંથી ગાંધીનગર ઉત્તર, કલોલ અને માણસા બેઠક આંચકી લીધી છે. જેને પગલે ગાંધીનગરમાં ભાજપના નેતા-કાર્યકરો ગેલમાં જ્યારે કોંગ્રેસના ખેમામાં સોપો પડી ગયો છે. જિલ્લાની પાંચેય બેઠકો પર જીત મેળવીને ભાજપે 1995નું પુનરાવર્તન કર્યું છે. 1995થી 2022 સુધીમાં જિલ્લામાં 7 ચૂંટણીઓ થઈ છે. 1995માં જિલ્લાની ચારેય બેઠક ભાજપની જીત થઈ હતી.

જે બાદ 1998માં 3 બેઠક પર જીત સાથે ભાજપનું પલડું ભારે રહ્યું હતું. 2002 અને 2007માં ભાજપ-કોંગ્રેસ બંનેને સરખી બેઠકો હતી. જોકે 2012થી જિલ્લામાં પાંચ બેઠકો થતાં છેલ્લી બે ટર્મથી કોંગ્રેસ પાસે ત્રણ બેઠકો હતી. જોકે ભાજપે 1995નું પુનરાવર્તન કરીને તમામ બેઠકો પર કમળ ખીલવ્યું છે.

ગાંધીનગર ઉત્તર બેઠક પર જંગી બહુમતીથી જીતનાર રીટાબેન પટેલ ગાંધીનગર જિલ્લામાં ભાજપમાં ચૂંટાયા હોય તેવા પ્રથમ ધારાસભ્ય બની ગયા છે. ગાંધીનગર કોર્પોરેશનમાં ભાજપમાંથી ચૂંટાયેલા હોય તેવા પ્રથમ મેયર તરીકે પણ તેઓનું નામ ઇતિહાસમાં અંકિત થયેલું છે. ત્યારે ભાજપનું માઈક્રોલેવલનું પ્લાનિંગ, વડાપ્રધાન-કેન્દ્રીય ગૃહમંત્રીની સભાઓ, કોંગ્રેસની નિષ્ક્રિયતાને પગલે ભાજપની જીત થઈ છે.