તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

આરોગ્ય વિભાગને પત્ર:જયંતિ રવિએ ગુજરાતીમાં લખેલા ત્રણ પાનાના આભાર પત્રમાં કહ્યું, કોરોનાનો પડકાર ઝીલી આપણે મજબૂત થઈ આગળ વધ્યા, આકરી મહેનતનું પરિણામ મળ્યું

ગાંધીનગર3 મહિનો પહેલા
  • કૉપી લિંક
પૂર્વ આરોગ્ય અગ્રસચિવ જ્યંતી રવિ ( ફાઈલ ફોટો) - Divya Bhaskar
પૂર્વ આરોગ્ય અગ્રસચિવ જ્યંતી રવિ ( ફાઈલ ફોટો)
  • જ્યંતી રવિની તામિલનાડુમાં ઓરોવિલ ફાઉન્ડેશનના સચિવ તરીકે નિમણૂક કરાઈ

ગુજરાતનાં આરોગ્ય અગ્રસચિવ જયંતી રવિની તાત્કાલિક અસરથી ઓરોવિલ ફાઉન્ડેશન તામિલનાડુનાં સચિવ તરીકે 3 વર્ષ માટે બદલી કરવાના આદેશ થયો હતો. કોરોનાકાળમાં ગુજરાતનાં આરોગ્ય અગ્રસચિવ તરીકેની જવાબદારી નિભાવનારાં જયંતી રવિ અનેક વિવાદોમાં રહ્યાં હતાં. રાજ્યમાં કોરોનાના કેસોમાં ઘટાડો થતાંની સાથે જ એકાએક તેમની બદલી થતાં સચિવાલય અને ઉચ્ચ અધિકારીઓમાં ભારે ચર્ચાનો વિષય બન્યો હતો. તેમણે આરોગ્ય પરિવારને ગુજરાતી ભાષામાં ત્રણ પાનાનો આભારપત્ર લખ્યો છે.

આરોગ્ય પરિવારને લખેલો આભારપત્ર અક્ષરસઃ

આરોગ્ય પરિવારનાં મારાં સ્વજનો,
ગુજરાત સરકારમાં આરોગ્ય વિભાગના કમિશનરનો હોદ્દો સંભાળવાથી માંડીને આરોગ્ય અને પરિવાર કલ્યાણ વિભાગના અગ્રસચિવ તરીકે કામગીરી કર્યાના સમયગાળામાં આપણે સૌએ મળીને જે કામગીરી કરી એના પરિણામે હાંસલ થયેલી સિદ્ધિઓને યાદ કરીને હું અભિભૂત થઈ જાઉં છું. નાગરિકોને યોગ્ય, વાજબી અને સાર્વત્રિક આરોગ્ય સંભાળ અને સુવિધાપ્રધાન કરવા માટેની આરોગ્ય વિભાગની પ્રતિબદ્ધતા અને સંકલ્પને સાકાર કરવામાં આપ સર્વેના નિરંતર પ્રયાસોનો ખૂબ જ મોટો ફાળો છે.

તાજેતરમાં જ પ્રકાશિત થયેલા સસ્ટેનેબલ ડેવલપમેન્ટ ગોલ નીતિ આયોગ ઈન્ડેક્સ વર્ષ 2020-21માં આરોગ્ય સંબંધિત SD4-3માં ગુજરાત 86 સ્કોર સાથે દેશમાં તમામ રાજ્યોમાં પ્રથમ ક્રમાંકે છે. આપના અથાક પ્રયાસોને પરિણામે જ રાજ્ય સરકારે અપ્રતિમ સિદ્ધિઓનાં શિખરો સર કર્યાં છે એ બદલ હું આપ સર્વેને અભિનંદન પાઠવું છું. આપ સૌએ વિવિધ ફરજ રૂપે વિવિધ સ્તરે પોતાનો અમૂલ્ય ફાળો આપ્યો છે. છેલ્લાં કેટલાંક વર્ષો ખૂબ જ ફળદાયી રહ્યાં છે. આ સમયગાળામાં આપણે ઉત્તરોત્તર વધુ સક્ષમતા, સુદૃઢતા અને કાર્યક્ષમતા સાથે સિદ્ધિઓ મેળવતા ગયા. જેમ કે માતા અને નવજાત શિશુ મરણ, રસીકરણ, જન્મ સમયે નવજાત શિશુનું ઓછું વજન, એનિમિયા, સેક્સ રેશિયો, સ્પેસિંગ પદ્ધતિઓ, માનસિક આરોગ્ય, પોષણ, ચેપી રોગો, બિનચેપી રોગો, વગેરે આરોગ્ય ક્ષેત્રે ઉત્કૃષ્ઠ કામગીરી કરવામાં ગુજરાત અગ્રેસર છે. વિશેષ કરીને 35 જેટલા અન્ય રાષ્ટ્રીય આરોગ્ય કાર્યક્રમો, જેમ કે રાષ્ટ્રીય બાળ સુરક્ષા કાર્યક્રમ, જનની શિશુ સુરક્ષા કાર્યક્રમ વગેરેમાં આપણું પ્રદર્શન પ્રભાવશાળી રહ્યું છે.

કોરોના મહામારીએ આપણી સમક્ષ અભૂતપૂર્વ પડકાર મૂક્યો, પ્રથમ કેસ આવ્યાને 14 મહિના વીતી ગયા બાદ પણ કોરોના આરોગ્ય, સામાજિક તેમજ આર્થિક પરિસ્થિતિને અસર કરી રહ્યો છે. આ મહામારીએ આરોગ્ય તંત્ર તેમજ આપણા આરોગ્યકર્મીઓ પર પણ ભારે દબાણ ઊભું કર્યું. તેમ છતાં એમાં આપણે વધુ મજબૂત થઈને ઊભરી આવ્યા. રાજ્યભરના સમગ્ર આરોગ્ય તંત્રએ અન્ય રાજ્યોની સરખામણીમાં કોરોના રોગચાળાને નાથવા ઉદાહરણ પૂરું પાડે તેવી કામગીરી કરી છે.

વિશ્વ આરોગ્ય સંસ્થા, IIPH, IIM અમદાવાદ જેવી સંસ્થાઓએ પણ ગુજરાતમાં કામગીરીને બિરદાવી છે. એનું દસ્તાવેજીકરણ પણ ભારતના બીજા કોઈ ક્ષેત્ર રાજ્ય કરતાં પહેલાં કરેલું છે. હવે ગુજરાતે કોરોના સંક્રમણથી બચવા માટેના અમોધ શસ્ત્ર એવા રસીકરણમાં પણ ઉમદા કામગીરી કરીને અગ્રેસર રાજ્ય બન્યું છે. વારંવારના રિવ્યૂ અને ફોલોઅપથી આપણે થાકી પણ જતા હોઈશું, પરંતુ આકરી મહેનતનું પરિણામ પ્રોત્સાહક પુરવાર થયું.

મને ગર્વ થાય છે કે આપ સર્વે આ પડકારોનો સામનો કરી ઉત્તમ આરોગ્ય સંભાળ પૂરી પાડવાના પ્રયાસો થાક્યા વિના કરી રહ્યા છો. અંતરિયાળ, પછાત અને વંચિતો સુધી પહોંચવાના આપના પ્રયાસો પ્રશંસનીય રહ્યા છે. આ પ્રસંગે રોગચાળા વચ્ચે પણ આરોગ્ય સંભાળ ક્ષેત્રે મળેલા આપ સર્વેનાં અભૂતપૂર્વ સહકાર, પ્રતિબદ્ધતા, મહેનત અને અપ્રતિમ યોગદાન બદલ હું આપનો આભાર વ્યક્ત કરું છું.

આ મહામારીએ આપણી સમક્ષ ભયાનક પડકાર ઊભો કર્યો હોવા છતાં આપણને આરોગ્ય પ્રણાલીને વધુ મજબૂત કરવા મલ્ટી સેક્ટર, જુદા જુદા હિતેચ્છુઓના સર્વગ્રાહી અભિગમને અપનાવવાની તક મળી છે. આપણે હજી ઘણાં સીમાચિહ્નો અને સિદ્ધિઓ હાંસલ કરવાની ક્ષમતા ધરાવીએ છીએ. ત્યારે આપની ફરજનિષ્ઠા, ખંત અને મહેનત ગુજરાતને પ્રગતિનાં નવાં શિખરો સર કરવામાં મદદરૂપ થશે.

ગત સોમવારે 4 વર્ષ આપની સાથે આરોગ્ય વિભાગમાં ફરજ અદા કર્યા પછી હવે મારી બદલી થતાં હું આરોગ્યની ફરજોમાંથી મુક્ત થઈ, પણ આપણા સંબંધો હંમેશાં અકબંધ રહેશે. આપના પ્રયાસો અને અભૂતપૂર્વ યોગદાન બદલ આપનો અંતઃકરણપૂર્વક આભાર માની આપને તેમજ આપનાં પરિવારજનોને શુભેચ્છાઓ પાઠવું છું.

કોણ છે ડો. જયંતી રવિ?
વર્ષ 2002માં ડો. જયંતી રવિ પંચમહાલ જિલ્લાનાં કલેક્ટર હતાં. ત્યાર બાદ શિક્ષણ વિભાગ, ગ્રામવિકાસ પ્રધાનમંત્રી કાર્યાલય જેવા વિભાગોમાં પણ તેમનું મહત્ત્વનું યોગદાન રહ્યું છે.
આ સિવાય તેઓ કડક વહીવટકર્તા છે. તેઓ 11 જેટલી ભાષા જાણે છે. તેમણે સંસ્કૃત ભાષામાં ઘણાં પુસ્તકો પણ લખ્યાં છે. તેમણે શાસ્ત્રીય સંગીતની તાલીમ પણ લીધી છે. તેમણે મદ્રાસ યુનિવર્સિટીમાંથી અભ્યાસ કરી હાર્વર્ડ યુનિવર્સિટીમાં અભ્યાસ કર્યો છે. ત્યાર બાદ તેમણે મેનેજમેન્ટ વિષયમાં PhD પણ કર્યું છે.