તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

વાઈરલ વીડિયો:ગોકુળપુરામાં ગટર સફાઈ મુદ્દે આપના મહિલા ઉમેદવારના પતિ અને ભાજપના ઉમેદવાર વચ્ચે ઉગ્ર બોલાચાલી

ગાંધીનગર25 દિવસ પહેલા
  • ભાજપના ઉમેદવારે દાદાગીરીભર્યું વર્તન કર્યાનો આક્ષેપ

ગોકુળપુરામાં ગટર સફાઇના મુદ્દે આજે શનિવારે સવારે આમ આદમી પાર્ટીના સ્થાનિક મહિલા ઉમેદવારના પતિ સાથે ભાજપના ઉમેદવારે દાદાગીરીભર્યું વર્તન કર્યું હોવાનો આક્ષેપ થઈ રહ્યો છે. એટલું જ નહી, ભારતીય જનતા પક્ષના ઉમેદવાર દ્વારા આમ આદમી પાર્ટીના ઉમેદવારને ઘરમાં બેસી જવાની ધમકી આપી અસભ્ય ભાષાનો પ્રયોગ કર્યો હોવાનો આક્ષેપ પણ થઈ રહ્યો છે.

સમગ્ર બનાવની હકીકત એવી છે કે, બે - ત્રણ દિવસ પૂર્વે ભાજપના ઉમેદવાર મફાભાઇ દેસાઇ દ્વારા એવો દાવો કરવામાં આવ્યો હતો કે ગોકુળપુરામાં ગટરોની સફાઈ તેમણે કરાવી છે. મારા ભાઈએ આ દાવો કર્યાના બીજા દિવસે આમ આદમી પાર્ટીના રઘુભાઈ રબારીએ વોર્ડના ઉમેદવારો ભુમીબેન રબારી, નગીનભાઈ નાડિયા તથા તુષારભાઇ પરીખની ઉપસ્થિતિમાં સ્થળ ઉપર જઈને ઉભરાતી ગટરોના વિડીયો બનાવી ગોકુળપુરા વસાહતના વોટ્સએપ ગ્રુપમાં વાઇરલ કર્યા હતા અને જણાવ્યુ હતુ કે કોઇ સફાઇ થઇ નથી. આ વીડિયો વાઇરલ થતાં આજે સેક્ટર-24 સુવિધા કચેરીમાંથી, ગટરોની સફાઈ માટે મશીનરી સાથે તંત્રનાં માણસો દોડી આવ્યા હતા.

ગોકુલપુરામાંથી સામે આવેલી ક્ષતીને સુધારવા માટે જ્યારે ગટરની સાફ સફાઈ થઈ રહી હતી ત્યારે આ કામગીરી દરમ્યાન રઘુભાઈ રબારી એ જાતે ઉપસ્થિત રહી કામગીરી યોગ્ય થાય છે કે નહીં તે જોવા સાથે કારીગરોને આ સમસ્યાનો કાયમી નિકાલ આવે તે રીતે કામ કરવા વિનંતી કરી હતી. ત્યારે અચાનક જ ભાજપના ઉમેદવાર મફાભાઇ દેસાઇ સ્થળ પર આવ્યાં હતાં અને તેમણે રઘુભાઈ રબારીને ધમકાવી અપશબ્દો બોલી અને આ બધું કામ પોતે કરાવ્યું હોવાનો દાવો કર્યો હતો. એટલું જ નહી, વીડિયો વાઈરલ કરવા બાબતે ઉશ્કેરાઈને ઉગ્ર બોલાચાલી કરી હતી. આ બોલાચાલી દરમ્યાન તેમણે રઘુભાઈ રબારીને ઘરમાં બેસી રહેવા જણાવ્યું હતું.

આ દરમિયાન રઘુભાઈ રબારી એ સવાલ કર્યો કે દસ વર્ષથી ગટરો ઉભરાય છે અને ભાજપની સત્તા હતી ત્યારે કામ થયું નથી, હવે ચૂંટણી આવી છે ત્યારે તમે સફાઈ કરાવવા આવ્યા છો પરંતુ અત્યાર સુધી તમે ક્યાં હતા? તેના જવાબમાં ભાજપના ઉમેદવાર મફાભાઇ દેસાઇએ કહ્યું કે અત્યાર સુધી ગોકુળપુરામાં માત્ર કૉંગ્રેસના કૉર્પોરેટરો હતા એટલે એમને જઈને પૂછો.

આમ મફાભાઇ દેસાઇએ ગોકુળપુરામાં કૉંગ્રેસના કોર્પોરેટરો જીત્યા હોવાથી ગોકુળપુરા પ્રત્યે કિન્નાખોરીથી ભાજપે કામ ન કર્યું હોવાનો આડકતરો સ્વીકાર કર્યો હોવાનો ઉલ્લેખ રઘુભાઈ રબારીએ કર્યો હતો. આ વીડિયો વાયરલ થતાં ગાંધીનગરમાં સ્વચ્છતાના મુદ્દે કે નાગરિકોના આરોગ્યના મુદ્દે પણ વ્હાલા - દવલાની નીતિ અપનાવવામાં આવતી હોવાની ચર્ચા ઊઠવા પામી છે.

અન્ય સમાચારો પણ છે...