ઘરકંકાસ:પતિનાં જેઠાણી સાથેના અવૈધ સંબંધોમાં સંસાર તૂટયો, હવે કોર્ટ કેસ પાછો ખેંચવા દારૂ પી ધમકીઓ આપતા પરિણીતાએ ફરી કેસ કર્યો

ગાંધીનગરએક મહિનો પહેલા
  • કૉપી લિંક
  • પતિ - સાસરિયા ત્રાસ આપતા પરિણીતાએ ઝેરી દવા પી આપઘાતનો પ્રયાસ કર્યો હતો

ગાંધીનગરની યુવતીને લગ્નનાં છ મહિનામાં જ તેના પતિ અને જેઠાણી વચ્ચેનાં અવૈધ સંબંધોની જાણ થઈ જતાં થયેલ ઘરકંકાસ ના કારણે તેણીએ ઝેરી દવા પી આપઘાતનો પ્રયાસ કર્યો હતો. જે અન્વયે આશરે ત્રણ વર્ષથી ચાલી રહેલો કોર્ટ કેસ પરત ખેંચી લેવા પતિએ દારૂ પીને અવારનવાર ફોન પર ધમકી અને મેસેજ કરવાનું ચાલુ રાખતા અડાલજ પોલીસ મથકમાં ગુનો દાખલ કરવામાં આવ્યો છે.

ગાંધીનગરનાં તારાપુર ખાતે રહેતી 27 વર્ષીય યુવતી હાલમાં કોસ્મેટિકનો કોર્સ સેકટર 15 આઈ ટી આઈ માં કરી રહી છે. જેનાં લગ્ન વર્ષ 2016 માં સમાજના રીત રિવાજ મુજબ અમદાવાદના વેજલપુરમાં રહેતા અને અમદાવાદ મ્યુનિસિપલ કોર્પોરેશનમાં પટાવાળા તરીકે નોકરી કરતા યુવક સાથે થયા હતા. લગ્ન પછી કેટલાય અરમાનો સાથે યુવતી તેના પતિના ઘરે રહેવા ગઈ હતી.

શરૂઆતમાં પતિ અને જેઠાણી વચ્ચે થતી ઔપચારિક વાતોને તે સહજતાથી લેતી હતી પરંતુ પતિ - જેઠાણી વચ્ચે અવૈધ સંબંધો ચાલી રહ્યાની જાણ તેને છ મહિના પછી થઈ હતી. જેના કારણે તેણીએ સાસરીમાં વાત કરતા પતિ - સાસરિયા વાતને દબાવી દઈ ત્રાસ આપવા લાગ્યા હતા. પરંતુ ઘરસંસાર તૂટે નહીં તે માટે પરિણીતાએ મૂંગા મોઢે ત્રાસ સહન કરી રાખી પતિ સુધરી જાય તેની રાહ જોઈ હતી.

પરંતુ પતિ - સાસરિયા ત્રણ વર્ષ સુધી તેને શારીરિક માનસિક ત્રાસ આપવાનું ચાલુ રાખતા તેણે ઝેરી દવા પી આપઘાત કરવાનો પ્રયાસ કર્યો હતો. જે અંગે વર્ષ 2019 માં અમદાવાદ પોલીસ મથકમાં શારીરક માનસિક ત્રાસ સબબ ગુનો પણ નોંધાયો હતો. જે કેસ હાલમાં પણ અમદાવાદ કોર્ટમાં ચાલી રહ્યો છે.

પરંતુ છેલ્લા ઘણા લાંબા સમયથી તેનો પતિ અવારનવાર ફોન પર મેસેજ કરી આપી કેસ પરત ખેંચી લેવા માટે ધાક ધમકીઓ આપી રહ્યો હતો. આટલે સુધી તો ઠીક હતું પણ પતિએ તેણીની બહેનને પણ મેસેજ કરી ધાક ધમકી આપવામાં કાંઈ બાકી રાખ્યું ન હતું.

ઘણીવાર તો દારૂ પી ને પણ પતિ જેમતેમ ભાષામાં ધાક ધમકીઓ આપતો હોવાથી આખરે કંટાળીને પરિણીતાએ ફરિયાદ આપતાં અડાલજ પોલીસ મથકમાં ગુનો નોંધી વધુ તપાસ હાથ ધરવામાં આવી છે.

અન્ય સમાચારો પણ છે...