તમારા શહેરના લેટેસ્ટ સમાચાર અને ફ્રી ઈ-પેપર મેળવો

ડાઉનલોડ કરો

પરીક્ષા:ગાંધીનગર જિલ્લામાં ધોરણ 10 અને 12ના રીપીટર વિદ્યાર્થીઓની આવતીકાલથી પરીક્ષા શરૂ

ગાંધીનગર22 દિવસ પહેલા
  • કૉપી લિંક
  • ધોરણ 10ના 9 હજાર 350 વિદ્યાર્થીઓ પરીક્ષા આપશે ધોરણ 12ના 4 હજાર 500 વિદ્યાર્થીઓ પરીક્ષા આપશે

ગાંધીનગર જિલ્લાના ધોરણ 10 અને 12ના 13 હજાર 850 જેટલા રીપીટર વિદ્યાર્થીઓની બોર્ડની પરીક્ષા આવતીકાલ ગુરૂવારથી યોજાશે. જેમાં ધોરણ 10ના સૌથી વધુ 9 હજાર 350 વિદ્યાર્થીઓ પરીક્ષા આપશે. જ્યારે બાકીના ધોરણ 12ના 4 હજાર 500 સામાન્ય પ્રવાહ તેમજ વિજ્ઞાન પ્રવાહના વિદ્યાર્થીઓ પરીક્ષા આપશે. રીપીટર વિદ્યાર્થીઓ અને તેમના વાલીઓના ઉગ્ર વિરોધ છતાં પણ પરીક્ષાનું આયોજન કરવામાં આવ્યું છે.

રાજ્યભરમાં આવતીકાલ ગુરૂવારથી ધોરણ 10 અને 12ના રીપીટર વિદ્યાર્થીઓની બોર્ડની પરીક્ષાનું આયોજન કરવામાં આવ્યું છે, ત્યારે ગાંધીનગરમાં પણ વિદ્યાર્થીઓ નિશ્ચિત કરાયેલા પરીક્ષા કેન્દ્રો પરથી પરીક્ષા આપશે. આ સાથે, કોરોનાની ગાઇડલાઇનનું પાલન પણ કરાવવામાં આવશે. આથી, સ્કૂલ સંચાલકો દ્વારા વર્ગખંડોમાં વિદ્યાર્થીઓ માટે તૈયારીઓ શરુ કરી દેવામાં આવી છે. જેમાં પદ્ધતિસર બાકડા ગોઠવવા, બ્લોક પ્રમાણે વિદ્યાર્થીઓને કઈ રીતે બેસાડવા, સેનેટાઈઝ કરવું વગેરે પ્રકારનું આયોજન કરવામાં આવી રહ્યું છે.

ધોરણ 10 અને ધોરણ 12ના રીપીટર વિદ્યાર્થીઓને માસ પ્રમોશન આપવામાં આવ્યું નથી. જોકે, નિયમિત વિદ્યાર્થીઓને માસ પ્રમોશન આપવામાં આવ્યું છે. આથી, વિદ્યાર્થીઓ અને વાલીઓએ સરકારના આ નિયમનો વિરોધ પણ કર્યો હતો, તેમ છતાં પણ હજુ સુધી આ અંગે કોઈપણ પ્રકારનો નિર્ણય રીપીટર વિદ્યાર્થીઓના પક્ષમાં સરકાર તરફથી લેવામાં આવ્યો નછી. આથી, અંતે વિદ્યાર્થીઓ માટે પરીક્ષાનું આયોજન 15 જુલાઈએ એટલે કે આવતીકાલે કરવામાં આવ્યું છે. જેમાં ધોરણ 10ના 9 હજાર 350 વિદ્યાર્થીઓ પરીક્ષા આપશે, જ્યારે ધોરણ 12ના 4 હજાર 500થી પણ વધુ વિદ્યાર્થીઓ પરીક્ષા આપશે. 40 જેટલી સ્કૂલોમાં આ રીપીટર વિદ્યાર્થીઓની બેઠક વ્યવસ્થાનું આયોજન કરવામાં આવ્યું છે.

કોરોનાની ગાઇડલાઇન પ્રમાણે વિદ્યાર્થીઓ સંક્રમિત ન થાય તેના માટે પરીક્ષા ખંડમાં એક બેન્ચ પર એક વિદ્યાર્થીને બેસાડવામાં આવશે. જે હેતુથી પરીક્ષાના એક દિવસ પહેલા જ ક્લાસરૂમની એક એક બેન્ચ સેનેટાઇઝ કરવામાં આવી હતી. આ ઉપરાંત, વિદ્યાર્થીઓની પરીક્ષા પહેલા તેમને હેન્ડ સેનિટાઈઝર આપવામાં આવશે. એક બિલ્ડિંગમાં 10 બ્લોક રાખવામાં આવશે. ભીડ એકત્રિત ના થાય તે માટે આ પ્રકારનું આયોજન કરવામાં આવ્યું છે.

કોરોનાની બીજી લહેરમાં પોઝિટિવ કેસ ઓછા થતા ગુજરાત સરકાર દ્વારા 15 જુલાઈથી ધોરણ 12ના વિદ્યાર્થીઓ માટે સ્કૂલો શરૂ કરવાની પરવાનગી આપવામાં આવી છે. ગુરૂવારથી ધોરણ 10 અને ધોરણ 12 ના બોર્ડના રીપીટર વિદ્યાર્થીઓની પરીક્ષાઓ શરૂ થઇ રહી છે, જે જોતા મોટાભાગની સ્કૂલોમાં વિદ્યાર્થીઓ માટે પરીક્ષાઓનું આયોજન કરવામાં આવ્યું છે. આ પરીક્ષા 28 જુલાઈ સુધી ચાલશે. આ હેતુથી 29 જુલાઈથી ધોરણ 12 માટે સ્કૂલો શરૂ થાય તે પ્રકારની તૈયારીઓ સ્કૂલ સંચાલકોની છે.

અન્ય સમાચારો પણ છે...