ચૂંટણી:સ્થાનિક સ્વરાજની ચૂંટણીમાં વધુ 140 ઉમેદવારીપત્રનું વિતરણ

જિલ્લા પંચાયત, તાલુકા પંચાયત અને પાલિકાની કુલ 126 બેઠકો માટે ચોથા દિવસે વધુ 140 ઉમેદવારી પત્રોનું વિતરણ થયું હતું. જ્યારે તેની સામે 23 ફોર્મ ભરાયા હતા. સ્થાનિક સ્વરાજની ચુંટણીના ઉમેદવારીપત્ર ભરવાનો છેલ્લો દિવસ શનિવાર છે.

સ્થાનિક સ્વરાજની ચુંટણીમાં ગાંધીનગર જિલ્લા પંચાયતની કુલ 28 સીટો, કલોલ, માણસા અને દહેગામ તાલુકા પંચાયતની 80 સીટો અને દહેગામ તથા કલોલ પાલિકાની 18 સીટો માટે છેલ્લા ત્રણ દિવસમાં કુલ 863 ફોર્મનું વિતરણ થયું છે. જ્યારે ગુરૂવાર ચોથા દિવસે વધુ 140 ઉમેદવારી પત્રકો ઉમેદવારો લઇ જતા અત્યાર સુધી કુલ 1003 ફોર્મનું વિતરણ થયું છે. ગુરૂવારે ચોથા દિવસે ગાંધીનગર તાલુકા પંચાયત વિસ્તારમાં આવેલી જિલ્લા પંચાયતની 8 સીટો માટે વધુ 6 ફોર્મનું વિતરણ થયું હતું. તેજ રીતે કલોલ તાલુકા પંચાયતની ચુંટણી માટે 31 અને પાલિકાના 42 ફોર્મનું વિતરણ કરાયું છે. જ્યારે માણસા તાલુકા પંચાયત હદમાં જિલ્લા પંચાયત સીટોના 6, તાલુકા પંચાયતની સીટોના 55 ફોર્મનું વિતરણ થયું હતું. ઉમેદવારી ફોર્મના વિતરણની સાથે સાથે ભરાવવાની કામગીરી પણ કરવામાં આવી છે. જેમાં કલોલ તાલુકામાંપાલિકાના 7, તાલુકા પંચાયતના 6 ફોર્મ ભરાયા હતા. જ્યારે માણસા તાલુકામાંથી નગરપાલિકાના 1, જિલ્લા પંચાયત અને તાલુકા પંચાયતના 1-1 ફોર્મ ભરાયા હતા.