રાજ્યસભામાં ગુજરાતના પ્રશ્નોની રજૂઆત:સેસ વસૂલો એટલે રાજ્યોને હિસ્સો મળે જ નહીં, નાણાંમંત્રી PA, PSની પસંદગી માટે આત્મનિર્ભર નથીઃ ગોહિલ

રાજ્યસભામાં બજેટની ચર્ચામાં કોંગ્રેસના ગુજરાતના સાંસદ શકિતસિંહ ગોહિલે કેન્દ્ર સરકારની આકરી ઝાટકણી કાઢતા કહ્યું કે, નાણાં મંત્રી પોતાના પી.એ. અને પી.એસ.ની પસંદગી કરવા માટે આત્મનિર્ભર નથી તો બજેટ આત્મનિર્ભર ક્યાંથી હોય? તેમણે ગુજરાત સહિતના રાજ્યોને ટેક્સનું થતું નુકસાન, ખેડૂતો, અલંગ સહિતના પ્રશ્નોની રજૂઆત કરી હતી. દરમિયાનમાં કોંગ્રેસ પ્રવક્તા મનીષ દોશીએ કહ્યું કે, ગુજરાત સરકારને દર મહિને પેટ્રોલ-ડીઝલ પરના વેટ વસૂલીથી રૂ.1200 કરોડની આવક થાય છે.

સેસ મારફત ટેક્સ નાંખી અબજો વસૂલતા હોવાનો દાવો
સાંસદ શક્તિસિંહ ગોહિલે કહ્યું કે અત્યારે જે નેતાઓ સત્તામાં છે તેઓ વિરોધ પક્ષમાં હતા ત્યારે આવકવેરાનો સ્લેબ ઓછામાં ઓછો રૂ. 10 લાખનો હોવો જોઇએ તેવી રજૂઆત કરતા હતા. ગોહિલે કહ્યું કે, સેસ મારફત ટેક્સ નાખીને સરકારે અબજો વસુલે છે,પણ ટેક્સને બદલે સેસથી વસૂલતી હોવાથી રાજ્ય સરકારને તેનો હિસ્સો મળવાની જોગવાઇ ન હોવાથી મળતો નથી.