ભાવવધારાનો વિરોધ:મટિરિયલમાં ભાવ વધારાે થતા બિલ્ડરો કામ બંધ રાખશે

બિલ્ડીંગ મટિરિયલ સીમેન્ટ, સ્ટીલ સહિતની વસ્તુઓના કુત્રિમ ભાવવધારાના વિરોધમાં બિલ્ડરો આવતીકાલે 12મીને શુક્રવારના રોજ કામગીરી બંધ રાખીને વિરોધ કરશે. કૃત્રિમ ભાવ વધારાને પરત ખેંચીને છેવાડાના માનવીને સસ્તા મકાનનો સરકારનો ઇરાદો ફળીભૂત થશે તેમ કોન્ફીડીરેશન ઓફ રીયલ એસ્ટેટ ડેવલોપમેન્ટ એસોસિએશન ઓૅફ ઇન્ડિયા ગાંધીનગરે જણાવ્યું છે.

કોરોનાની મહામારીને પગલે દરેક ક્ષેત્રમાં મંદીનો માર સહન કરી રહ્યો છે. તેમાં રિયલ એસ્ટેટ વિભાગ બાકાત રહ્યા નથી. ત્યારે મંદીના માર વચ્ચે સિમેન્ટ અને સ્ટીલના ઉત્પાદક કંપનીઓ દ્વારા ગેરકાયદેસર કાર્ટેલ કરીને કોઇપણ કારણ વગર તદ્દન ગેરવ્યાજબી રીતે અસહ્ય ભાવ વધારો કર્યો છે. બિલ્ડીંગ મટિરિયલ સ્ટીલ, સીમેન્ટ, ગ્રીટ, કપચી, સિમેન્ટ બ્લોક, પેવર્સ, ઇંટો, સેનેટરી વસ્તુઓના ભાવો પણ અસહ્ય વધી ગયા છે. જેનાથી બાંધકામની પડતર કિંમતમાં પણ વધારો થતા સમગ્ર દેશના રીયલ એસ્ટેટમાં સંકળાયેલા બાંધકામ વ્યવસાયકારો દ્વારા વિરોધ કરવામાં આવી રહ્યો છે.

બિલ્ડીંગ મટિરિયલના ભાવમાં થયેલા અસહ્ય ભાવવધારાને પગલે બિલ્ડર મિત્રોને પણ વેચાણ કિંમતમાં 15થી 20 ટકાનો ભાવ વધારો કરવાની ફરજ પડી હોવાનું કોન્ફીડીરેશન ઓફ રીયલ એસ્ટેટ ડેવલોપમેન્ટ એસોસિએશન ઓફ ઇન્ડિયા, ગાંધીનગરના પ્રમુખ સુરેશભાઇ એન. પટેલે જણાવ્યું છે.