હાઇકમાન્ડનો નિર્ણય:ભાજપના મોટા પાટીદાર નેતાની રુખસદ નક્કી, બંગાળ મોકલાશે; કમલમ પરની બેઠકમાં ચૂંટણી દસેક દિવસમાં જાહેર થશે તેની ચર્ચા

ગુજરાત ભાજપના એક મોટા ગજાના પાટીદાર નેતાની ગુજરાતમાંથી રુખસદનો તખ્તો તૈયાર કરી દેવાયો છે. ભાજપના સૂત્રોના જણાવ્યા અનુસાર આ નેતાને હાઇ કમાન્ડે બંગાળમાં જવા જણાવી દીધું છે, પરંતુ આ નેતા વ્યક્તિગત કારણો આગળ ધરીને જવાનું ટાળી રહ્યાં છે. ભાજપના આ નેતા ગુજરાતમાં ભાજપની સરકાર, સંગઠન અને સંઘમાં ખૂબ મોટી પકડ ધરાવે છે. જો કે આ નેતાને ગુજરાત છોડવાની ઇચ્છા નથી. હાલ સ્થાનિક સ્વરાજ્યની સંસ્થાઓની ચૂંટણીને લઇને તેમની બંગાળમાં બદલી અટકી ગઇ છે. ફેબ્રુઆરીના અંત સુધીમાં સ્થાનિક સ્વરાજ્યની ચૂંટણીઓ પૂર્ણ થઇ જાય તે પછી આ નેતાને બંગાળ મોકલી દેવાશે.

ચૂંટણીની સમીક્ષા માટે એક બેઠક બોલાવી
મંગળવારે ભાજપ પ્રમુખ સી આર પાટીલે સ્થાનિક સ્વરાજ્યની સંસ્થાઓની ચૂંટણીની સમીક્ષા માટે એક બેઠક બોલાવી હતી. આ બેઠકમાં પાર્ટી સ્તરે ચર્ચા થઇ હતી કે આગામી દસેક દિવસમાં સ્થાનિક સ્વરાજ્યની સંસ્થાઓની ચૂંટણીઓ જાહેર થઇ શકે છે.