પ્લોટ મેટ્રો માટે ફાળવવા માટે કોર્પોરેશને તજવીજ:કોર્પોરેશન દ્વારા રાયસણ પાસેની જમીન મેટ્રો રેલ માટે આપવાની તજવીજ

ગાંધીનગર કોર્પોરેશન વિસ્તારમાં રાયસણ વિસ્તારમાં આવેલો પ્લોટ મેટ્રો માટે ફાળવવા માટે કોર્પોરેશને તજવીજ હાથ ધરી છે. ગુજરાત મેટ્રો રેલ કોર્પોરેશન લી. દ્વારા રિસિવિંગ પાવર સ્ટેશન બનાવવા માટે ટીપી-1 વિસ્તારમાં આવેલ આવેલ 5 હજાર ચોરસમીટર જગ્યા ફાળવવા માંગણી કરેલી છે. જેને પગલે ગાંધીનગર કોર્પોરેશન દ્વારા આ અંગે સ્થાયી સમિતિમાં નિર્ણય લેવાશે. સોમવારે કોર્પોરેશન ખાતે સ્થાયી સમિતિની બેઠક મળશે. જેમાં મેટ્રોને જમીન ફાળવવા માટે કમિશનર તરફથી કરાયેલી ભલામણ અંગે નિર્ણય લેવાશે.

રાયસણ પાસે આવેલી આ જમીનની બજાર કિંમત હાલ 35 કરોડ જેટલી થાય છે. જોકે સરકારના પરિપત્ર મુજબ મેટ્રોની કામગીરી માટે જંત્રી ભાવથી જ જમીન ફાળવવાની થતી હોવાથી કોર્પોરેશનને જમીન ફાળવણીથી બજાર ભાવ સામે 1.40 કરોડ જેટલા જ મળે તેવી સ્થિતિ છે. ઉલ્લેખનિય છે કે, મોટેરાથી મહાત્મા મંદિર સુધી મેટ્રો ફેઝ-2ની કામગીરી હાલ પૂરજોશમાં ચાલી રહી છે. મોટેરા સ્ટેડિયમથી મહાત્મા મંદિર સુધી 22.84 કિલોમીટર એલિવેડેટ કોરિડોર અને 20 એલિવેટેડ સ્ટેશન બનાવાશે.