ધરપકડ:મારામારીના કેસમાં 4 વર્ષથી ફરાર આરોપી ઝબ્બે

ખેડા જિલ્લાના આંતરસુંબા પોલીસ સ્ટેશનના ગુનામાં 2016થી નાસતા ફરતાં આરોપીને ગાંધીનગર રેન્જ લેવલની નાસતા ફરતાં ટીમ-2એ ઝડપી પાડ્યો છે. રેન્જ આઈજી અભય ચુડાસમા દ્વારા નાસતા ફરતાં આરોપીઓને પકડી પાડવા ટીમની રચના કરાઈ છે. ત્યારે પીઆઈ જે. જી. વાઘેલાની ટીમના પીએસઆઈ ડી. એસ. રાઓલ સ્ટાફ સાથે પેટ્રોલિંગમાં હતા, ત્યારે હેડ કોન્સ્ટેબલ અનુપસિંહના ખાનગી રાહે આરોપી અંગે બાતમી મળી હતી.

જેના આધારે પોલીસે ગાંધીનગર સિવિલ કેમ્પસમાંથી રાહુલનાથ ઢાલનાથ ભાટી(રહે-ગણેશપુરા, મદારીવાસ, દહેગામ)ને ઝડપી પાડ્યો હતો. આરોપીની પૂછપરછ કરતાં 4 વર્ષ પહેલાં તેની સામે ખેડાના આંતરસુંબા પોલીસ સ્ટેશનમાં ગુનો નોંધાયેલો છે. જેમાં તેના પિતરાઈ ભાઈએ પોતાના ગામની છોકરી સાથે પ્રેમલગ્ન કર્યા હતા. જે બાબતે ઝઘડામાં મારામારીમાં સામાવાળાએ તેની વિરૂદ્ધ ફરિયાદ નોંધાવી હતી. જે કેસમાં તે અત્યાર સુધી નાસતો ફરતો હતો. જેને પગલે ગાંધીનગર પોલીસે તેને ઝડપીને તેની સામે કાર્યવાહી હાથ ધરી હતી. નોંધનીય વાત એ છે કે, આરોપી ખેડા જિલ્લાના આંતરસુંબા પોલીસ સ્ટેશનના ગુનામાં 2016થી નાસતા ફરતો હતો.