અકસ્માત:રાંધેજા પાસે ટ્રકની ટક્કરે બાઈક પર જતા પિતા-પુત્ર ગંભીર રીતે ઘાયલ

ગાંધીનગર તાલુકાના રાંધેજા ખાતે ટ્રકની ટક્કરે બાઈક પર જતા બે લોકો ગંભીર રીતે ઘાયલ થયા હતા. અમદાવાદ કોતરપુર ઠાકોર વાસમાં રહેતાં ભરતભાઈ રણછોડભાઈ ઠાકોર અને તેમનો દિકરો નગીન રવિવારે કામ અર્થે માણસાના ધોળાકુવા ગામે જવા માટે બપોરે એક વાગ્યે નીકળ્યા હતા. અઢી વાગ્યે દીકરી પર 108માંથી ફોન આવ્યો હતો અને અકસ્માત અંગે જાણ કરી હતી. અકસ્માતમાં ગંભીર રીતે ઘાયલ પિતા-પુત્રને ગાંધીનગર સિવિલ બાદ અમદાવાદ ખસેડાયા હતા. અકસ્માતમાં ભરતભાઈના ડાબા પગે ટ્રકનું ટાયર ફરી વળતા પગનું તળીયુ લટકી પડ્યું હતું.

જ્યારે નગીનને હાથે-પગે અને માથામાં ઈજાઓ થતાં તે અર્ધ બેભાન થઈ ગયો હતો. ઘટનાની જાણ થતાં ભરતભાઈના પિતરાઈ ભાઈ ડાહ્યાજી આતાજી ઠાકોર અમદાવાદ સિવિલ પહોંચ્યા હતા. જેઓએ અકસ્માત અંગે પૂછતાં ભરતભાઈએ ટ્રક ચાલક ટક્કર મારી હોવાનું તથા અકસ્માત બાદ ચાલક ટ્રક મુકીને ભાગી ગયો હોવાનું કહ્યું હતું. ડાહ્યાજી ઠાકોરે અકસ્માત અંગે પેથાપુર પોલીસ સ્ટેશનમાં ફરિયાદ નોંધાવી હતી.