સંક્રમણ:મનપા અને ગ્રામ્યમાંથી નવા 10 કેસ નોંધાયા, કોરોનાથી એકેય દર્દીનું મોત નહીં, વધુ 7 દર્દી કોરોનામુક્ત થયાં

જિલ્લામાં કોરોનાના નવા 10 કેસ માત્ર મનપા અને ગાંધીનગર તાલુકામાંથી જ નોંધાયા છે. આથી જિલ્લામાં અત્યાર સુધી કોરોનાના કુલ કેસનો આંકડો 8078એ પહોંચ્યો છે. જ્યારે ગુરૂવારે સંક્રમિત કેસોની સરખામણીમાં સાજા થનાર દર્દીઓનો રેસિયો 70 ટકા એટલે 7 દર્દીઓને રજા આપતા કુલ 7282 દર્દીઓ કોરોનામુક્ત થયા છે. જ્યારે સારવાર લેતા એકપણ દર્દીનું મોત નિપજ્યુ નથી.

મનપા વિસ્તારમાંથી નવા 5 કેસમાં સેક્ટર-4ના 65 વર્ષીય વૃદ્ધ, સેક્ટર-5નો 25 વર્ષીય યુવાન, સેક્ટર-21ના 62 વર્ષીય વેપારી, સેક્ટર-2નો 28 વર્ષીય યુવાન, સેક્ટર-3નો 34 વર્ષીય એન્જિનીયર સંક્રમિત થયો છે. સંક્રમિતોના સંપર્કવાળા 16 વ્યક્તિઓને કોરન્ટાઇન કર્યા છે.

જ્યારે ગાંધીનગર તાલુકામાંથી નવા 5 કેસમાં જમીયતપુરાના 81 વર્ષીય મહિલા, રાયસણના 46 વર્ષીય વેપારી, રાંદેસણમાંથી 83 વર્ષીય વૃદ્ધ, 51 વર્ષીય આધેડ, 49 વર્ષીય આધેડ કોરોનામાં સપડાયા છે.