વિરોધનો વંટોળ:કલોલના તબીબોએ એક દિવસની રીલે હંગર હડતાલ કરી

કેન્દ્ર સરકાર દ્વારા નોટિફિકેશન બહાર પાડીને આયુર્વેદના સ્નાતક તબીબોને પોસ્ટ ગ્રેજ્યુએશન પછી એલોપથીમાં ઓપરેશન કરવાની મંજૂરી આપતો ઠરાવ કર્યો છે. જેને પગલે એલોપથીના ડોક્ટરોમાં વિરોધનો વંટોળ શરૂ થયો છે. અને આયુર્વેદના તબીબો ને ઓપરેશનની મંજૂરી સામે વિરોધ પ્રદર્શિત કરી એક દિવસની રીલે હંગર હડતાલ પાડી હતી. આ અંગે મળતી માહિતી અનુસાર કેન્દ્ર સરકાર દ્વારા આયુર્વેદના તબીબો એલોપથીમાં ઓપરેશન કરવાની મંજૂરી આપતો ઠરાવ કરાયો છે. જેનો ઈન્ડિયન મેડિકલ એસોસિએશન દ્વારા વ્યાપક વિરોધ કરાઈ રહ્યો છે.

અને આ ઠરાવ રદ કરવાની માગણી સાથે દેશભરમાં તબીબો દ્વારા વિરોધ પ્રદર્શિત કરી હડતાલ જેવા કાર્યક્રમો કરાઈ રહ્યા છે. આ મામલે તબીબોએ મેડિકલ હોલમાં આ ઠરાવના વિરોધમાં ધરણાં કર્યા હતા અને આયુર્વેદના તબીબોને ઓપરેશનની મંજૂરી આપતો ઠરાવ રદ કરવાની માગણી કરી હતી. કાર્યક્રમમાં કલોલ મેડિકલ એસોસિયેશનના પ્રમુખ ડો. કેતન પી. ઠાકર સેક્રેટરી ડો. પ્રવિણ પી. પ્રજાપતિ તેમજ એસોસિયેશનના સભ્યો ડો. રજની પટેલ, ડો. રજત એન્જિનીયર તબીબો જોડાયા હતા.