દુર્ઘટના:કલોલની કેમિકલ ફેક્ટરીમાં રાત્રે પ્રચંડ ધડાકો થતાં ઇજાગ્રસ્ત કામદારનું મોત, 4 લોકો ઘાયલ

કલોલ જીઆઇડીસીમાં આવેલી એક ફેકટરીમાં ગત મોડી રાત્રે મશીનમાં કેમિકલની બેચ ભરતી વખતે એકાએક પ્રચંડ ધડાકો થયો હતો. તેમાં ગંભીર ઇજા થવાથી કામદાર રમણલાલ પટેલ ઉંમર વર્ષ 55નું મોત નીપજ્યું હતું. જ્યારે ચાર કામદારો ઘાયલ થતાં તેમને સારવાર માટે હોસ્પિટલમાં ખસેડવામાં આવ્યા હતા.આ અંગે મળતી માહિતી અનુસાર કલોલ જીઆઇડીસીમાં આવેલી બ્રીક સાયન્સીસ પ્રાઈવેટ લિમિટેડ નામની કંપનીમાં ગત મોડીરાત્રે પ્રચંડ ધડાકો થયો હતો.

હાર્મોન્સનો પાઉડર બનાવતી ફેક્ટરીમાં મશીનો ઉપર કામદારો કામ કરી રહ્યા હતા અને પાઉડર બનાવવા માટેની બેચ મશીનમાં ભરી રહ્યા હતા ત્યારે ધડાકો થયો હતો. રાત્રિના સમયે એકાએક ધડાકો થતા આસપાસમાં ભારે અફરાતફરી મચી ગઈ હતી અને લોકોના ટોળેટોળા એકત્ર થઇ ગયા હતા. બનાવની જાણ પોલીસને થતા પોલીસ દોડી આવી હતી. પોલીસે તપાસ હાથ ધરી છે. શરીરે ઇજાઓ થતા સારવાર માટે કલોલની ખાનગી હોસ્પિટલમાં ખસેડાયા હતા.

ઘાયલોના નામ
(૧) જયવીર મેરુ સિંગ ચાવડા
(૨) પ્રકાશ બબાભાઈ દંતાણી
(૩) મનીષ કુમાર કનુભાઈ જાદવ
(૪) સુનિલકુમાર સુરેશભાઈ પટેલ