ટ્રાફિકની વિકટ સમસ્યા:દહેગામના ઝાક ગામે દર સોમવારે રોડ પર ભરાતા બજારથી પરેશાની

દહેગામ તાલુકાના ઝાક ગામે ઔદ્યોગિક એકમો આવેલા છે. જ્યાં દર સોમવારે ઝાક વહેલાલ રોડ પર ઓપન પાથરણા બજાર ભરાતું હોવાથી આ માર્ગ પર ટ્રાફિકની વિકટ સમસ્યાઓ સર્જાતા ગામના સરપંચ સુહાગભાઈ પંચાલે દહેગામ મામલતદાર અને પીઆઈને પત્ર લખી ટ્રાફિકને લઈ થતું અડચણ અટકાવવાની માંગ કરી છે.

ઝાકગામે સેંકડો ઔદ્યોગિક એકમો આવેલા છે, જે એકમોએ સોમવારે બંધ રહેતા હોવાથી અને આ દિવસે કામદારો તેમને ખપતી ચીજવસ્તુઓની ખરીદીમાં જોતરાતા હોવાથી ઝાક વહેલાલ રોડ પર દર સોમવારે ઓપન પાથરણા બજારની હાટડીઓ મંડાય છે.જ્યાં દહેગામ ઉપરાંત અમદાવાદ અને નરોડાથી અસંખ્ય ફેરિયાઓ ધંધાર્થે આવે છે અને રોડની નજીકમાં જ બેસી ધંધો કરતા હોવાથી દર સોમવારે ટ્રાફિકની વિકટ સમસ્યા સર્જાય છે.

આ માર્ગ પર ટુ વ્હીલર, ફોર વ્હીલર, ટ્રક, ટેન્કર, લોડિંગ રિક્ષા, એસટી બસ, એએમટીએસ તેમજ ઓએનજીસીનાં ભારે વાહનો ઓપન બજાર વચ્ચેથી પસાર થતા હોવાથી અકસ્માતની ભીતિ રહેલી છે. જેથી આ સ્થિતિ પર નિયંત્રણ લાવી સોમવારે ભરાતા બજારનું અડચણ અટકાવવા ગામના સરપંચ સુહાગભાઈ પંચાલે દહેગામ મામલતદાર અને પીઆઈને પત્ર પાઠવી માંગ કરી છે.