તાતને હાશ:આંબાના કલમની ખેતીએ ગોદડિયાનો ખેડૂતની દશા અને દિશા બદલી

આહવા19 દિવસ પહેલા
  • કૉપી લિંક
ઘર બેઠા વૈજ્ઞાનિક અભિગમથી ખેડૂતે કલમની ખેતીમાં નફો રળતા રાહત થઇ હતી. - Divya Bhaskar
ઘર બેઠા વૈજ્ઞાનિક અભિગમથી ખેડૂતે કલમની ખેતીમાં નફો રળતા રાહત થઇ હતી.
  • કોરોના કાળની ખોટને વઘઈ કૃષિ વિજ્ઞાન કેન્દ્રના માર્ગદર્શન અને સુજબુજથી સરભર કરી

કોરોનાના કપરા કાળમા પાંચેક લાખના મરચાના પાકના કોઈ લેવાલ નહી મળતા મહેનત માથે પડી હોવા છતાં હૈયે હામ રાખીને ફરીથી પરિશ્રમ કરી, આંબા કલમ તૈયાર કરીને, પોતાને થયેલી ખોટને સરભર કરી લઈ, ગોદડિયાનો યુવાન ખેડૂત અન્યો માટે પ્રેરણાનો સ્ત્રોત બન્યો છે.

કોરોનાના વર્ષમા એટલે કે પ્રથમ લોકડાઉન વેળા પોતે તૈયાર કરેલી મરચીનો પાક કોઈ ખરીદવા તૈયાર ન હતું. જેને લઈને અંદાજે 5 લાખની ખોટને કારણે માથે હાથ દઈને બેઠેલા વઘઇ તાલુકાના ગોદડિયાના ખેડૂતને નવી રાહ ચીંધી કૃષિ વિજ્ઞાન કેન્દ્ર-વઘઇએ અમૂલ્ય માર્ગદર્શનઆપીને તેને ફિનિક્સ પક્ષીની જેમ રાખમાંથી પુનઃ બેઠો કર્યો છે.

પોતાના ખેતરમા માત્ર પાંચ ગુંઠા જેટલી મુઠ્ઠીભર જમીનમા બારેક હજાર જેટલી મધમીઠી કેરીની વિવિધ જાતો હાફૂસ, કેસર, લંગડો, દશેરીની કલમો ઉછેરીને એક કલમના રૂ. 70 પ્રમાણે 12 હજાર કલમનો કુલ રૂ. 8.40 લાખમાં સોદો પાકો કરીને ગોદડિયાના યુવા ખેડૂત હસમુખ બાગુલે ખોટમાંથી બેઠા થવાનો સાહસિક માર્ગ પસંદ કર્યો છે.

પોતાની બાપીકી એક હેક્ટર-15 આરે જમીન પૈકી માત્ર પાંચ ગુંઠામા જ, દસ દસ માસથી આંબા કલમને ઉછેરીને લાખોનો નફો રળતા આ યુવાન ખેડૂત હસમુખ બાગુલે જણાવ્યું હતું કે, કોરોના કાળમા હિંમત હાર્યા પછી, ફરી બેઠા થવુ મુશ્કેલ હતુ ત્યારે જ વઘઇના કૃષિ વિજ્ઞાન કેન્દ્રના બાગાયત વૈજ્ઞાનિક હર્ષદ પ્રજાપતિ તથા તેમની ટીમે નવિન અને સાહસિક આંબા કલમના ઉછેરની દિશા બતાવી.

જેના થકી દશેક માસમા જ 12 હજાર આંબા કલમ તૈયાર કરીને, ખેતર બેઠા લેવાલ પણ મળી જતા તેનામા નવો જોમ અને જુસ્સો આવ્યો છે. તેને જોઈને અન્ય ખેડૂતો પણ નવતર ખેતી પાકો તરફ વળી રહ્યા છે તેમ હસમુખ બાગુલે જણાવ્યું હતું.

આંબા કલમ સિવાય જો તેણે પાંચ ગુંઠામા મરચી, રીંગણ, ટામેટા જેવા ધરૂ તૈયાર કર્યા હોત તો માત્ર પાંચ-સાત હજારની જ આવક મેળવી શક્યો હોત તેમ જણાવતા તેણે આંબા કલમ કરીને 8 લાખ ઉપરાંતની આવક મેળવી છે તેમ જણાવ્યું હતું. હસમુખ બાગુલે 12 હજાર આંબા કલમ તૈયાર કરવા માટે શરૂઆતમા એકાદ મહિનો 15-20 મજૂરો રાખવા પડ્યા હતા.

ઘરબેઠા વૈજ્ઞાનિક પદ્ધતિથી ધરૂ તૈયાર કરે તો આવકનો સ્ત્રોત મળી રહે
ડાંગ જિલ્લામાં મરચી, રીંગણ, ટામેટા, આંબા જેવા પાકોમાં અહીંના ખેડૂતોને ધરૂવાડિયુ લેવા માટે છેક વ્યારા કે વાંસદા સુધી જવું પડતું હોય છે ત્યારે જો તેઓ અહી ઘરબેઠા જ વૈજ્ઞાનિક પદ્ધતિથી ધરૂ તૈયાર કરે તો તેમનું આર્થિક ભારણ હળવુ કરવા સાથે આવકનો નવો સ્ત્રોત પણ મળી રહે છે. - હર્ષદ પ્રજાપતિ, બાગાયત વૈજ્ઞાનિક, વઘઈ કે.વિ.કે.

અન્ય સમાચારો પણ છે...