કડાકા ભડાકા સાથે આગ લાગી:સુબીરના બરડા ગામે ઘર પર વીજળીનો તાર પડતાં ઘર સહિત દુકાન બળીને ખાખ

સુબીર તાલુકાના અંતરિયાળ વિસ્તારમાં આવેલા બીજુરપાડાના બરડા ગામે ઘર ઉપર વિજળીનો તાર પડવાથી અચાનક આગ લાગતાં ઘર સહિત દુકાનનો માલ સામાન બળીને ખાખ થઈ ગયો હતો. ડાંગ જિલ્લાના સુબીર તાલુકાના અંતરિયાળ વિસ્તારમાં આવેલ બીજુરપાડાના બરડા ગામે સંજુ ભીલુભાઈ ચૌધરીના ઘર ઉપર વિજળીનો તાર પડવાથી અચાનક આગ લાગતાં અફરાતફરીનો માહોલ સર્જાયો હતો. બરડા ગામે બનેલી ઘટનાની મળતી માહિતી મુજબ સાંજના સમયે ખેડૂત પરિવાર પોતાના ઘરમાં હતો. તે સમયે ઘર ઉપર વિજળીનો તાર પડતાં જોત જોતામાં ઘર ઉપરથી આગ ફાટી નીકળી હતી.

આગે વિકરાળ સ્વરૂપ ધારણ કરતાં ઘરમાં જ દુકાન હોય ઘરમાં મુકેલો સામાન અને દુકાનનો સામન મળી કુલ 2 લાખનુ નુકસાન થતાં પરીવાર ઉપર આભ તૂટી પડયું હતું. અચાનક આગની ઘટના બનતા ઘર માલિક સંજુભાઈ આગને ઓલવવા જતાં દાઝી ગયા હતા. જેમને તાત્કાલિક 108 દ્વારા આહવા સિવિલ હોસ્પિટલ ખાતે સારવાર માટે ખસેડવામાં આવ્યા હતા. જ્યારે આગ લાગવાની જાણ આસપાસના લોકોને થતાં તમામ લોકો આગ ઓલવવા દોડી આવ્યા હતા. આ ઘટનાને લઈને સુબીર તાલુકા વિકાસ અધિકારી અને મામલતદાર ડિઝાસ્ટર આહવાએ આગળની કાર્યવાહી હાથ ધરી હતી.