વાતાવરણમાં અચાનક પલટો આવતાં વરસાદ:આહવા સહિતના આજુબાજુના વિસ્તરોમાં અમી છાંટણા વરસ્યા; ગરમીથી બફાતા લોકોને વરસાદથી ઠંડક પ્રસરતા રાહત મળી

ડાંગ જિલ્લાના મુખ્ય મથક આહવા ખાતે ઐતિહાસિક ડાંગ દરબાર મેળામાં કમોસમી વરસાદનો વિધ્ન નડ્યો હતો. શનિવારે સાંજે અચાનક વાતાવરણમાં પલ્ટો આવતા વીજળીના કડાકા ભડાકા સાથે વરસાદ તૂટી પડતા લોકોમાં ભાગદોડ મચી જવા પામી હતી.

ડાંગ જિલ્લામાં ઐતિહાસિક ધરોહર સમુ ડાંગ દરબાર મેળામાં કમોસમી વરસાદે વિઘ્ન ઉભું કરતા મેળામાં સ્ટોલ ધારકો સહિત મનોરંજન એક્ટિવિટીમાં રંગમાં ભંગ પડ્યો હતો. શનિવારે સાંજે અચાનક આકાશમાં કાળા ડિબાંગ વાદળો ઘેરાયા બાદ એકાએક તૂટી પડેલા કમોસમી વરસાદે મેળા આયોજકોને દોડતા કરી દીધા હતા. મેળામાં ખુલ્લેઆમ સ્ટોલ બનાવી ધંધો કરતા વેપારીઓને પોતાનો માલ સામાન બચાવવા ભારે જહેમત ઉઠાવી પડી હતી. જ્યારે હોળીની ખરીદી કરવા આવેલ ડાંગ દરબારીઓને પણ માવઠાનો સામનો કરવો પડ્યો હતો.

જોકે દિવસભર વાતાવરણમાં ભેજનો વધારો નોંધાતા લોકો ગરમીથી ત્રસ્ત બન્યા હતા. જેને કમોસમી વરસાદ બાદ સમગ્ર પંથકમાં શીત લહેર વ્યાપી જતા લોકોએ ગરમીથી રાહત મેળવી હતી. અલબત્ત કમોસમી વરસાદને પગલે ડાંગના છૂટા છવાયા વિસ્તારોમાં આમ્ર મંજરી ખરી પડવા સાથે ખરીફ પાકોમાં જીવાત પડવાની શક્યતા સાથે નુકસાની થવાની નોબત ઉભી થઇ હતી.