અકસ્માત:બાઇક ચાલકે રાહદારીને અડફેટમાં લેતા ઇજા

સુખસરના પ્રજાપતિ ફળિયામાં એક મોટરસાયકલ ચાલકે પૂરપાટ અને ગફલતભરી રીતે હંકારી લાવી કંથાગરના એક રાહદારીને અડફેટમાં લઈ ગંભીર ઇજાઓ પહોંચાડી હતી. ઇજાગ્રસ્તને તાત્કાલિક સરકારી દવાખાનામાં પ્રાથમિક સારવાર બાદ સંતરામપુર રીફર કર્યો હતો.

ફતેપુરા તાલુકાના કંથાગર ગામના દિલીપભાઈ કે. બારીયા આજરોજ બપોરના 2 વાગ્યાના અરસામાં ઘર સામાન લેવા માટે સુખસરમાં આવ્યા હતા. જેઓ પ્રજાપતિ ફળિયાથી આસપુર ચોકડી બાજુ જઈ રહ્યા હતા. તેવા સમયે મોટરસાયકલ નંબર જીજે-20-એએન-4025.ના ચાલકે પૂરપાટ હંકારી લાવી દિલીપભાઈને અડફેટે લઇ અકસ્માત કરતા ડાબા પગે ગંભીર ઇજાઓ પહોંચવા પામી હતી. જ્યારે મોટરસાયકલ ચાલક બનાવના સ્થળે મોટરસાઈકલ મૂકી ફરાર થઈ ગયો હતો. મોટરસાયકલ સુખસર પોલીસે કબજે લીધી છે.