દારૂની હેરાફેરીનો પર્દાફાશ:ઝાલોદના રણિયાર પાસે ટવેરામાં લવાતા 1.68 લાખના દારુ સાથે ઝાલોદ તાલુકાના બે બુટલેગર ઝડપાયા

દાહોદ એલ.સી.બી. પોલીસે ઝાલોદ તાલુકાના રણીયાર ગામે વોચ ગોઠવી હતી.ત્યારે એક ટવેરા ગાડીમાં લઈ જવાતો વિદેશી દારૂનો રૂા. 1,68,000ના જથ્થા સાથે ગાડીની કિંમત મળી કુલ રૂા.4,68,000નો મુદ્દામાલ ઝડપી પાડયો છે.

બાતમીના આધારે પોલીસે વોચ ગોઠવી હતી
દાહોદ એલ.સી.બી. પોલીસને મળેલી બાતમીના આધારે ઝાલોદ તાલુકાના રણીયાર ગામે આવતાં જતાં તમામ નાના મોટા વાહનોની તલાસી હાથ ધરતાં હતાં.તે સમયે ત્યાંથી બાતમીમાં દર્શાવેલી એક ટાવેરા ગાડી પસાર થતાં પોલીસ સાબદી બની હતી અને ફોર વ્હીલર ગાડી નજીક આવતાંની સાથે તેને ચારેય તરફથી પોલીસે ઘેરી લીધી હતી.ગાડીમાં સવાર ચાલક સુરેન્દ્રભાઈ ઉર્ફે હની નગીનભાઈ તૈલી (રહે. લીમડી, તળાવ ફળિયા, ગોધરા રોડ, તા. ઝાલોદ, જિ.દાહોદ) અને ગાડીમાં સવાર અન્ય એક ઈસમ રતીલાલ સુમેશભાઈ હઠીલા (રહે. ડુંગરી ફળિયા, તા. ઝાલોદ, જિ.દાહોદ)ની પોલીસે અટકાયત કરી હતી.

બીયર અને વિદેશી દારુ લઈ જવાતો હતો
ફોર વ્હીલરની પોલીસે તપાસ હાથ ધરતાં ફોર વ્હીલર ગાડીમાંથી વિદેશી દારૂ તથા બીયરની પેટીઓ નંગ. 45 જેમાં કુલ બોટલો નંગ. 1440 કિંમત રૂા. 1,68,000 ના જથ્થા સાથે ફોર વ્હીલર ગાડીની કિંમત મળી કુલ રૂા. 4,68,000નો મુદ્દામાલ દાહોદ એલ.સી.બી. પોલીસે કબજે કરી ઉપરોક્ત બંન્ને ઈસમો વિરૂધ્ધ ગુનો નોંધી આગળની કાયદેસરની કાર્યવાહી હાથ ધરી છે.