નોટિસ:આરોગ્ય કેન્દ્રને ખંભાતી તાળા, 6 ફરજમુક્ત કરાયા

નીનામાના ખાખરિયાના પ્રાથમિક આરોગ્ય કેન્દ્રની ઓચિંતી મુલાકાત વેળા જિલ્લા વિકાસ અધિકારીને ત્યાં તાળા ઝુલતાં જોવા મળ્યા હતાં. આ બાબનતે ગંભીરતાથી લઇને તબીબી અધિકારી, ફાર્માસિસ્ટ, લેબટેક્નિશિયન, MPHS, FHSને કારણદર્શન નોટિસ આપવામાં આવી છે. જ્યારે આઉટસોર્સના 6 કર્મચારીઓને તાત્કાલિક અસરથી છુટ્ટા કરવાનો આદેશ કરવામાં આવ્યો હતો.

દાહોદ જિલ્લા વિકાસ અધિકારી નેહા કુમારી દ્વારા રોજ સાંજના 5.10 કલાકે લીમખેડા તાલુકાના પ્રાથમિક આરોગ્ય કેન્દ્ર,નિનામાના ખાખરીયાની આકસ્મિક મુલાકાત લીધી હતી. જ્યાં પ્રાથમિક આરોગ્ય કેન્દ્રના મુખ્ય દરવાજાને તાળું મારેલુ હતું. પ્રાથમિક આરોગ્ય કેન્દ્ર બંધ હતું. પ્રાથમિક આરોગ્ય કેન્દ્રના તમામ અધિકારી, કર્મચારીઓ ગેરહાજર હોવાનું જણાયુ હતું.

રજા અંગે તેઓએ સબંધિત ઉપરી અધિકારીની પૂર્વ મંજુરી પણ મેળવેલ ન હતી. આમ મનસ્વી રીતે પોતાના હેડ ક્વાર્ટર પર હાજર ન રહેનાર અધિકારી-કર્મચારીઓના કારણે વિવિધ રાષ્ટ્રીય આરોગ્ય કાર્યક્રમો અને અન્ય આરોગ્યલક્ષી કામગીરી તથા પ્રાથમિક આરોગ્ય કેન્દ્ર પર સેવાઓ માટે આવનાર લાભાર્થીઓ આરોગ્ય વિષયક સેવાઓથી વંચિત રહી જાય છે.

આ બાબતને દાહોદ જિલ્લા વિકાસ અધિકારી નેહાકુમારી દ્વારા ખુબ ગંભીરતાથી લઇ તાત્કાલિક અસરથી પ્રાથમિક આરોગ્ય કેન્દ્ર, નિનામાના ખાખરીયાના તબીબી અધિકારી, ફાર્માસિસ્ટ, લેબટેકનિશિયન, મલ્ટી પરપઝ હેલ્થ સુપરવાઈઝર, ફીમેલ હેલ્થ સુપરવાઈઝર તમામને તાલુકા આરોગ્ય અધિકારીના સ્પષ્ટ લેખિત અભિપ્રાય સાથે ખુલાસો રજુ કરવા કડક શબ્દોમાં નોટીસ આપવામાં આવી છે.

તે ઊપરાંત આઉટસોર્સિંગ એજન્સી દ્વારા નિમણુંક પામી પ્રાથમિક આરોગ્ય કેન્દ્ર પર ફરજ બજાવનાર 2 સ્ટાફનર્સ અને વર્ગ-4 ના 4 કર્મચારી સહિત કુલ- 6 સ્ટાફને ફરજમાંથી છુટા કરવા એજન્સીને જાણ કરી છે. વધુમાં લીમખેડા તાલુકા આરોગ્ય અધિકારીને તેમના હસ્તકના આરોગ્ય કેન્દ્રોમાં તેમના નબળા સુપરવિઝન અને વાંરવાર અધિકારી, કર્મચારીઓ દ્વારા ફરજ પ્રત્યે નિષ્કાળજી જણાઇ આવતા તેઓને પણ કારણદર્શક નોટીસ ફટકારવામાં આવી છે.