રોષ:સુખસરમાં GRD જવાનોને 2 માસનું વેતન ન ચૂકવાતાં મુશ્કેલીમાં મૂકાયા

ફતેપુરા તાલુકાના સુખસર પોલીસ સ્ટેશનમાં 70 જીઆરડીના જવાનો ફરજ બજાવી રહ્યા છે.જેઓને છેલ્લા બે માસથી વેતન ચૂકવવામાં આવ્યુ નથી.જ્યારે હાલમાં હોળી- ધુળેટીના તહેવાર નિમિત્તે આ વેતન નહીં ચૂકવતા ગરીબ પરિવારોમાંથી આવતા સભ્યો કે જેઓ આ વેતન ઉપરજ તેમનો આધાર હોય તેવાઓ માટે મુશ્કેલી ઊભી થઈ છે. ત્યારે તાત્કાલિક તેમણે બજાવેલી ફરજનું માનદ્ વેતન ચૂકવી આપવામાં આવે તેવી માંગ ઉઠી છે.

પોલીસની સમકક્ષ અને એક લાકડીના સહારે રાત્રી ફરજ બજાવી પ્રજાના જાન, માલ, મિલકતનું રક્ષણ કરતા જી.આર.ડી ના જવાનો મોટાભાગે ગરીબ પરિવારોમાંથી આવે છે. જેઓ દિવસ દરમિયાન ખેત મજૂરી અથવા દાહાડિયા મજૂરી કરી જ્યારે રાત્રી સમયે જી.આર.ડી ની ફરજ બજાવવા આવતા હોય છે. તેઓને દર મહિને સમયસર તેમણે બજાવેલી ફરજનું માનદ્ વેતન ચૂકવી આપવામાં આવે તો સરળતા રહે તેમ છે. પરંતુ આ જવાનોએ બજાવેલી ફરજનું દર માસે સમયસર માનદ્ વેતન ચૂકવવામાં આવતું નથી.

ચારથી પાંચ માસનો સમય વીતવા છતાં આ જી.આર.ડી ના જવાનોને માનદવેતન મેળવવા રાહ જોવી પડતી હોય છે. જ્યારે હાલમાં હોળી ધુળેટીનો તહેવાર છે. ગત બે માસનું આ જવાનોને માનદવેતન ચૂક વ્યું નથી. માનદ્ વેતન ઉપર જ આધાર રાખતા જીઆરડીના જવાનો હાલ મુશ્કેલીમાં મુકાયા છે. હોળી ધુળેટીના તહેવારની ઉજવણીથી પણ આ જવાનો વંચિત રહે તેવી પરિસ્થિતિ સર્જાઇ છે.