કર્મચારીઓ 'ઘેર' હાજર:લીમખેડાના નિનામાના ખાખરીયા PHC પર ડીડીઓએ રેડ પાડી, દરવાજે ખંભાતી તાળા ને આખો સ્ટાફ ગુમ, 6ને નોટીસ, 6 ઘર ભેગા

દાહોદ જિલ્લા વિકાસ અધિકારીએ લીમખેડા તાલુકામાં આવેલ પ્રાથમીક આરોગ્ય કેન્દ્ર, નિનામાના ખાખરીયાની આકસ્મિક મુલાકાત લીધી હતી.ત્યારે આરોગ્યના મુખ્ય દરવાજે તાળુ મારેલુ હતુ.આ આરોગ્ય કેન્દ્રનો તમામ સ્ટાફ ગેરહાજર જણાતાં મુખ્ય તબીબ અધિકારી સહિતના કર્મચારીઓને ખુલાસો રજુ કરવા નોટીસ આપી આરોગ્ય કેન્દ્રના કુલ 6 કર્મચારીઓને છુટા કરવાનો આદેશ કરતાં ગુલ્લેબાજોમા ફફડાટ ફેલાઈ ગયો છે.

રામ રાજ્ય ને પ્રજા સુખી,દવાખાનુ બંધ ને ડોક્ટર ઘેરને કર્મચારીઓ ને લીલાલહેર
દાહોદ જિલ્લા વિકાસ અધિકારી નેહાકુમારી દ્વારા ગત રોજ સાંજના 5 વાગે લીમખેડા તાલુકાના પ્રાથમિક આરોગ્ય કેન્દ્ર,નિનામાના ખાખરીયાની આકસ્મિક મુલાકાત લેવા ગયા હતા. જ્યાં પ્રાથમિક આરોગ્ય કેન્દ્રના મુખ્ય દરવાજાને તાળું મારેલુ હતું .પ્રાથમિક આરોગ્ય કેન્દ્રના તમામ અધિકારી કર્મચારીઓ ગેરહાજર હોવાનું ઝડપાયુ હતુ. રજા અંગે તેઓએ સબંધિત ઉપરી અધિકારીની પૂર્વ મંજુરી પણ મેળવેલી ન હતી.આમ મનસ્વી રીતે પોતાના હેડ ક્વાર્ટર પર હાજર ન રહેનાર અધિકારી/કર્મચારીઓના કારણે વિવિધ રાષ્ટ્રીય આરોગ્ય કાર્યક્રમો અને અન્ય આરોગ્યલક્ષી કામગીરી તથા પ્રાથમિક આરોગ્ય કેન્દ્ર પર સેવાઓ માટે આવનાર લાભાર્થીઓ આરોગ્ય વિષયક સેવાઓથી વંચિત રહી જાય છે.

THOના અભિપ્રાય સાથે ખુલાસો આપો
આ બાબતને જિલ્લા વિકાસ અધિકારીએ ખુબ ગંભીરતાથી લઇ તાત્કાલિક અસરથી પ્રાથમિક આરોગ્ય કેન્દ્ર,નિનામાના ખાખરીયાના તબીબી અધિકારી, ફાર્માંશીષ્ટ, લેબટેકનીશ્યન, મલ્ટી પરપઝ હેલ્થ સુપરવાઈઝર, ફીમેલ હેલ્થ સુપરવાઈઝર,તમામ ને તાલુકા આરોગ્ય અધિકારી ના સ્પષ્ટ લેખિત અભિપ્રાય સાથે ખુલાસો રજુ કરવા કડક શબ્દોમાં નોટીસ ફટકારવામાં આવી છે.

THOને પણ નબળા સૂપરવિઝનને કારણે નોટીસ ફટકારી
આ ઊપરાંત આઊટ સોર્સિંગ એજન્સી દ્વારા નિમણુંક પામી પ્રાથમિક આરોગ્ય કેન્દ્ર પર ફરજ બજાવનાર બે સ્ટાફનર્સ અને વર્ગ-4 ના 4 કર્મચારી સહીત કુલ 6 કર્મચારીઓને છુટા કરવા એજન્સીને જાણ કરી છે. વધુમાં તાલુકા આરોગ્ય અધિકારી લીમખેડાને તેમના હસ્તકના આરોગ્ય કેન્દ્રોમાં તેમના નબળા સુપરવિઝન અને વાંરવાર અધિકારી/કર્મચારીઓ દ્વારા ફરજ પ્રત્યે નિષ્કાળજી જણાય આવતા તેઓને પણ કારણદર્શક નોટીસ ફટકારવામાં આવી છે.

-