પાલિકા ચૂંટણી 2021:દાહોદમાં પાલિકાની ચૂંટણીમાં કોંગ્રેસે 24 નવા ઉમેદવારો ઉતાર્યા

દાહોદ શહેરમાં કોંગ્રેસે નગર પાલિકાની ચૂંટણીમાં ઝંપલાવનારા ઉમેદવારોના ફોર્મ ભરાવીને મેન્ટેડ આપ્યા બાદ શનિવારની સાંજે યાદી ફરતી કરી હતી. નવ વોર્ડમાં ચૂંટણી લડનારા 36 ઉમેદવારોમાંથી આ વખતે 24 નવા ચહેરા ઉતારવામાં આવ્યા છે.દાહોદ નગરપાલિકાની વર્ષ 2015માં થયેલી ચૂંટણીમાં ભાજપે 22, અપક્ષ 1 અને કોંગ્રેસે 13 બેઠકો મેળવી હતી. આ વખતે ઉમેદવારો શોધ‌વાની ઘટમાળ સાથે વિવિધ કારણે કયા વોર્ડમાંથી કોણ ઉમેદવાર ચૂંટણી લડશે તે કોંગ્રેસે જાહેર થવા દીધુ ન હતું.

શુક્રવારના રોજ મહત્તમ ઉમેદવારોને ફોર્મ ભરાવી દેવાયા હતા જ્યારે બચેલા ઉમેદવારોએ શનિવારે ફોર્મ ભરતાં તમામને મેન્ડેટ આપી દેવાયા હતાં. મેન્ડેટ આપી દીધા બાદ કોંગ્રેસ દ્વારા લિસ્ટ જાહેર કરાયું હતું. જોકે, ગત વખત કરતાં આ વખતે 36 ઉમેદવારોમાંથી કોંગ્રેસે 24 નવા ચહેરા ઉતાર્યા છે. કોંગ્રેસના બેનર ઉપરથી ગઇ વખતે વોર્ડ-1માંથી વિજેતા થયેલા માસુમા ગરબાડાવાલા ભાજપમાં જતાં રહ્યા હતાં.

તેવી જ રીતે વોર્ડ-6ના વિજેતા ઉમેદવાર નજમા પટેલ, વોર્ડ-7ના વિજેતા સુગરાબેન ઝાબુઆવાલા અને વોર્ડ-8ના સાયરા મન્સુરીએ આ વખતે દાવેદારી જ નોંધાવી ન હતી. આ વખતે ભાજપથી નારાજ થઇને કોંગ્રેસમાં જોડાયેલા વોર્ડ-3ના કાઇદ ચુનાવાલા અને વોર્ડ-5ના યુસુફ રાણાપુરવાલાને ટિકિટ ફાળવી હતી.

ભાણીને ભાજપની ટિકિટ મળતાં માસીએ કોંગ્રેસની ટિકિટ લેવાનું માંડી વાળ્યું
દાહોદ શહેરમાં વોર્ડ નંબર 8માંથી ગઇ વખતે સાયરાબેન મન્સુરી કોંગ્રેસના બેનર ઉપર વિજેતા થયા હતાં. આ વખતે તેમની ભાણી નસરીન મન્સુરીને ભાજપમાંથી ટિકિટ મળી ગઇ હતી. નસરીનને ટિકિટ મળવાની આશા પ્રબળ હોવાથી સાયરાબેન ગત વખતના વિજેતા હોવા છતાં ભાણીને કારણે આ વખતે કોંગ્રેસમાંથી ટિકિટની માગણી જ કરી ન હતી.

​​​​​​​