અકસ્માત:કાળીમહુડીમાં STની ટક્કરે બળદનું મોત, 7 પશુને ઇજા

ઝાલોદના કાળી મહુડીમાં પુરપાટ દોડી આવતી એક એસટી બસના ચાલકની ગફલતના કારણે રવજી ફળિયા નાળા સ્ટેશન પાસે રોડની બાજુમાં પાણીના નિકાલ માટે ચણેલ ચણતર પર ચડાવી દઈ એક ઘરના આંગણા સુધી લાવી માળા નીચે બાંધેલ ઢોરો સાથે અથડાવતા એક બળદનું મોત નિપજ્યું હતું. જ્યારે ત્રણ બળદ, એક ભેંસ તથા ત્રણ ગાયોને ઇજા થઇ હતી. જ્યારે લાઈટનો થાંભલો પડી જતાં બસના કાચ તૂટી જતા નુકસાન થયું હતું.

શનિવારે સવારે દશેક વાગ્યાના સુમારે એક એસટી બસ ચાલક બસ પૂરઝડપે હંકારી જઇ રહ્યા હતા. ત્યારે કાળીમહુડી ગામ પાસે ચાલકે સ્ટેરીંગ પરનો કાબૂ ગુમાવી દેતા રવજી ફળિયામાં રોડની બાજુમાં પાણીના નિકાલ માટે ચણેલ ચણતર ઉપર ચડાવી દઇ ધુળીયાભાઇ શક્કરીયાભાઇ કટારાના ઘરના આંગણા સુધી લઇ જઇ આંગણામાં બનાવેલ માળો પાડી દીધો હતો. માળા નીચે બાંધેલા ઢોરોને ટક્કર વાગતાં એક બળદનું મોત નિપજ્યું હતું. જ્યારે ત્રણ બળદ અને એક ભેંસ તથા ત્રણ ગાયોને ઇજાઓ થઇ હતી. તેમજ લાઇટનો થાંભલો પણ પડી જતાં એસટી બસના કાચ તૂટી જતાં નુકસાન થયું હતું.