વિવાદ:કેળકુવામાં છોકરીને ભગાવવામાં સાથ આપે છે કહી એક પર હુમલો

દાહોદ જિલ્લાના દેવગઢ બારિયા તાલુકાના કેળકુવા ગામના અભેસિંગભાઇ ધનાભાઇ રાઠવા ગતરોજ સાંજના સમયે ઘરે હતા. તે દરમિયાન ગામમાં રહેતા મંગાભાઇ ગમીરભાઇ રાઠવા તથા તેનો છોકરો કનુભાઇ મંગાભાઇ તથા પીન્ટુભાઇ મંગાભાઇ ગાળો બોલતા આવ્યા હતા અને કહેવા લાગેલા કે તુ અમારી છોકરીને તારા ભાઇના છોકરા સાથે ભગાડવામાં અને સંતાડવામાં મદદ કરે છે.

તેમ કહી જાનથી મારી નાખવાની ધમકીઓ આપતા ઘરમાં ભરાઇ અભેસિંગભાઇને લાકડીઓથી માર માર્યો હતો અને ઘરનો સરસાન તેમજ દાગીનાની અને રૂપિયાની તેમજ ચોપડાની પેટીઓ તોડી નાખી નુકસાન કર્યુ હતું. અભેસિંગભાઇને 108 દ્વારા દેવગઢ બારિયા સરકારી હોસ્પિટલ ખાતે સારવાર માટે લઇ જવાયા હતા. અભેસિંગભાઇએ હુમલાખોરો વિરૂદ્ધ સાગટાળા પોલીસ મથકે ફરિયાદ નોંધાવી હતી.