અકસ્માત:સાંપોઇ ગામમાં ટેમ્પોની ટક્કરે પિકઅપમાંથી ફેંકાયેલા 1ને ઇજા

દાહોદ જિલ્લાના ઝાલોદ તાલુકાના નાની સીમલખેડી ગામના અલ્કેશભાઇ રાયસીંગભાઇ કિશોરી તથા તેના કાકા મહેશભાઇ કાળુભાઇ જીજે-13-એટી-6266 નંબરની પીકઅપ ગાડીમાં લીમડીથી શાકભાજી ભરી ઝાલોદ વેચવા માટે ગયા હતા.

શાકભાજી વેચી સાંજના આશરે આઠેક વાગ્યાના અરસામાં પરત ઘરે આવવા ઝાલોદથી નિકળ્યા હતા. તે દરમિયાન સાંપોઇ ગામ આગળ લીમડી તરફથી આવતા એમપી-09-જીજી-9908 નંબરના આઇસર ટેમ્પો ચાલકે પોતાનું વાહન પુરઝડપે અને બેફિકરાઇ પૂર્વક હંકારી રોંગ સાઇડમાં લાવી અલ્કેશભાઇની પીકઅપ ગાડીને ખાલી સાઇડ ટક્કર વાગતાં અડધી પલ્ટી ખાઇ ગયેલ ગાડીમાંથી તેના કાકા મહેશભાઇ રોડ ઉપર ફેંકાઇ જતાં જમણા પગે સાથળથી ઉપરના ભાગે તથા બરડાના ભાગે અને મોઢા ઉપર ઇજા થઇ હતી. ઇજાગ્રસ્તને 108 એમ્બ્યુલન્સ દ્વારા લીમડી સરકારી દવાખાને સારવાર માટે લઇ જવામાં આવ્યા હતા. આ સંદર્ભે અલ્કેશભાઇ રાયસીંગભાઇ કિશોરીએ ટેમ્પો ચાલક વિરૂદ્ધ ફરિયાદ નોંધાવી હતી.