ક્રાઇમ:ગુમણી ગામની 13 વર્ષીય કિશોરી સાથે નરાધમનો દુષ્કર્મનો પ્રયાસ

લીમખેડા તાલુકાના ગુમણી ગામની 13 વર્ષીય કિશોરી સાંજે તેના ઘરની બહાર ઓટલા ઉપર બેઠી હતી. ત્યારે કિશોરીને એકલી જોઈ ગામના જ હિમત ગલા માવીના મનમાં વાસનાનો કીડો સળવળ્યો હતો. હિંમતે કિશોરીના મોઢા ઉપર રૂમાલ દબાવી બદઈરાદે બળજબરીથી અપહરણ કરી તેને નજીકની શાળામાં લઈ ગયો હતો. જ્યાં નરાધમ હિંમત માવી કિશોરી સાથે બીભત્સ અડપલા કરવા લાગ્યો હતો. ત્યારે પોતાની આબરૂ બચાવવા કિશોરીએ હિંમત દાખવી ચીસાચીસ કરી નરાધમના ડાબા હાથે બચકું ભરી લીધું હતું.

દરમિયાન આજુબાજુના રહીશો તથા હિંમતની પત્ની અને કિશોરીના પરિવારજનો શાળામાં આવી જતા હિંમત કિશોરીને છોડી બાજુના ખેતરોમાં થઈ નાસી ગયો હતો. આ અંગે કિશોરીની માતાએ હિંમત વિરુદ્ધ લીમખેડા પોલીસમાં ફરિયાદ નોંધાવતાં પોલીસે ગુનો નોંધી ધરપકડના ચક્રો હાથ ધર્યા છે.