અકસ્માત:અંધારીમાં બે બાઇક વચ્ચે અકસ્માત થતાં 1નું મોત

અંધારીમાં બે બાઈકો વચ્ચે ગમખ્વાર અકસ્માત થતા બાઇક સવાર એક યુવકનું મોત નિપજ્યું હતું જ્યારે અન્ય બાઇક સવાર મહિલાને માથામાં ગંભીર ઇજાઓ થઇ હતી. લીમખેડાના અંધારી ગામના નગીનભાઈ તેમની બાઈક ઉપર મીઠાભાઇ કસનાભાઇ પરમારને બેસાડી લીમખેડાથી પરત ઘરે જઈ રહ્યા હતા. તે દરમિયાન સાંજે છ વાગ્યાના સુમારે અંધારીના બસ સ્ટેન્ડ પાસે સામેથી આવતી એક નંબર વગરની પલ્સર બાઈકના ચાલકે પૂરઝડપે અને ગફલતભરી રીતે હંકારી આવી નગીનભાઈની બાઈકને જોરદાર ટક્કર મારી હતી. અકસ્માતમાં બાઈક સવાર મીઠાભાઇ પરમારને તથા ટક્કર મારનાર બાઈક ઉપર બેઠેલી મહિલાને માથામાં ગંભીર ઇજાઓ થઇ હતી. બંને ઈજાગ્રસ્તોને તાત્કાલિક લીમખેડા સરકારી દવાખાને ખસેડાયા હતા.જ્યાં ફરજ પરના તબીબે ગંભીર ઇજાગ્રસ્ત મીઠાભાઈ પરમારને મૃત જાહેર કરતા તેમના પરિવારજનોમાં આઘાત સાથે શોક વ્યાપી ગયો હતો.