કોર્ટ દ્વારા હુકમ:ઝાલોદ કોર્ટે 10 લાખના ચેક બાઉન્સ કેસમાં છ વર્ષે એક વર્ષની સજા ફટકારી

ઝાલોદ તાલુકાના લીમડી નગરના કારઠ ખાતે રહેતા સંદીપકુમાર હીરાલાલ શ્રીમારે ફરિયાદી અતુલકુમાર બમ્બ અને અરવિંદભાઈ બમ્બને પાંચ-પાંચ લાખના ચેક આપ્યા હતા. પરંતુ આ ચેક બેન્કમાં નાખતા બાઉન્સ થયા હતા. આથી બંને ફરિયાદીઓ દ્વારા ઝાલોદ કોર્ટેમાં 13 નવેમ્બર 2014ના રોજ વકીલ પી.એલ. મોરી દ્વારા નેગોશિએબેલ એક્ટ હેઠળ ફરિયાદ દાખલ કરવામાં આવી હતી.

જેમાં આ કેસ કોર્ટમાં ચાલી જતાં ઝાલોદ કોર્ટના એડિશનલ ચીફ મેજિસ્ટ્રેટ કે.સી.જોશી દ્વારા 1973ની કલમ 255-2ની જોગવાઈ અન્વયે આરોપીને તક્સીરવાન ઠેરવતાં રૂપિયા 10 લાખના ચેક બાઉન્સ કેસમાં આરોપીને 1 વર્ષની સજા ફટકારવામાં આવી હતી. તેમજ ફરિયાદીને એક માસમાં વ્યાજ સહિતની રકમ ચૂકવવા માટે કોર્ટ દ્વારા હુકમ કરવામાં આવ્યો હતો. કોર્ટે છ વર્ષ બાદ ચેક બાઉન્સ પ્રકરણમાં આરોપીને સજા ફટકારતાં પંથકમાં ચકચાર મચેલી જોવા મળી હતી.