સંતાનો સાથે માતા કૂવામાં કૂદી:દેવગઢ બારિયાના દેગાવાડા ગામે માતાએ માસુમ પુત્ર-પુત્રી સાથે આપઘાત કર્યો, ત્રણેયનાં મોત; ગૃહકંકાસના કારણે પગલું ભર્યું હોવાની શક્યતા

દેવગઢ બારિયા21 દિવસ પહેલા
  • કૉપી લિંક
દેગાવાડામાં પુત્ર-પુત્રી સાથે માતાએ કૂવામાં ભૂસકો મારતાં ત્રણેનાં મોત નિપજ્યાં હતાં. - Divya Bhaskar
દેગાવાડામાં પુત્ર-પુત્રી સાથે માતાએ કૂવામાં ભૂસકો મારતાં ત્રણેનાં મોત નિપજ્યાં હતાં.
  • પોલીસે મૃતદેહોને બહાર કાઢી પોસ્ટમોર્ટમ માટે ખસેડ્યા

દેવગઢ બારિયા તાલુકાના દેગાવાડા ગામમાં એક મહિલા અને તેનાં પુત્ર-પુત્રીની કૂવામાંથી લાશ મળી આવતાં ખળભળાટ મચી ગયો હતો. ગૃહ ક્લેશને કારણે મહિલા તેનાં બાળકોને લઇને કૂવામાં કૂદી ગઇ હોવાની ચર્ચાઓ સાંભળ‌વા મળી છે. જો કે આપઘાત પાછળનું સાચું કારણ સામે આવ્યું નથી. દેવગઢ બારિયા પોલીસે ત્રણેના મૃતદેહને કૂવામાંથી કઢાવીને પોસ્ટમોર્ટમ માટે મોકલીને હાલ અકસ્માતે મોત અન્વયે ગુનો દાખલ કરવાની તજવીજ હાથ ધરી છે.

દેવગઢ બારિયા તાલુકાના દેગાવાડા ગામમાં રહેતી 30 વર્ષિય મીનાક્ષીબેન સંજયભાઇ અને તેની 6 વર્ષિય પુત્રી અન્સીયા અને પુત્ર ભાવિકની ગામના કૂવામાંથી લાશ મળી આવતાં અરેરાટી ફેલાઇ ગઇ હતી. ગૃહ ક્લેશને કારણે મીનાક્ષીબેન, અન્સીયા અને ભાવિક સાથે કૂવામાં કૂદી ગઇ હતી અને પાણીમાં ડૂબી જવાને કારણે મોત થયું હોવાની ચર્ચાઓ સાંભળવા મળી રહી છે.

આ બનાવની જાણ થતાં દેગાવાડા ધસી ગયેલી પોલીસે ત્રણેની લાશ કૂવામાંથી કઢાવી હતી. આ ઘટના પગલે મૃતકના પરિવાર સાથે ગામમાં પણ શોકની લાગણી ફેલાઇ હતી. માતા-સંતાનોના મૃતદેહ પોસ્ટમોર્ટમ માટે દેવગઢ બારિયાના સરકારી દવાખાને ખસેડવામાં આવ્યા છે. પોલીસે વધુ તપાસ હાથ ધરી છે.

માતા સામે પણ હત્યાનો ગુનો નોંધાશે
દેગાવાડાની ઘટનામાં પોલીસે તલસ્પર્શી તપાસ આદરી છે. જો ગૃહ ક્લેશને કારણે જ આ અવિચારી પગલું ભર્યું હોય તો પતિ કે સાસરી પક્ષના કોઇ વ્યક્તિ વિરુદ્ધ આપઘાતની દુષ્પ્રેરણાનો ગુનો દાખલ થવાની શક્યતાઓ સાથે નાના ભૂલકાઓને લઇને કૂવામાં કૂદી ગયેલી માતા સામે પણ હત્યાનો ગુનો દાખલ કરાય તેવી આશંકા છે.

અન્ય સમાચારો પણ છે...