વિરોધ:સંખેડાના પરવેટામાં પીવાના પાણીની સમસ્યા હલ ન થતાં ચૂંટણી બહિષ્કાર

સંખેડા તાલુકાના પરવેટા ગામે પીવાના પાણીની સમસ્યાને લઇ તેમજ અન્ય અનેક સમસ્યાઓને લઈને ગ્રામજનો દ્વારા ચૂંટણી બહિષ્કાર કરવામાં આવ્યો હતો. ગામની એક મહિલાએ તો ઇચ્છામૃત્યુની માંગ પણ કરી હતી. સંખેડા તાલુકાના છેવાડે પરવેટા ગામ આવેલું છે. આ ગામમાં પીવાના પાણીની સમસ્યા ગંભીર બનેલી હોવાનું ગ્રામજનો જણાવી રહ્યા છે. ગામમાં શાળા પાસે એક બોર છે. ત્યાં મહિલાઓ પાણી ભરવા આવે છે.

લાઈટો જાય તો નજીક આવેલી હેરણ નદીએ જવું પડે છે. નદીએ જવાનો માર્ગ જોખમી છે. ક્યારેક મહિલા પડી જાય તો ક્યારેક માથે મુકેલ બેડા પડી પણ જાય છે. ગામમાં પીવાના પાણી ઉપરાંત અન્ય પ્રાથમિક સુવિધાઓ પણ અપૂરતી છે.ગામમાં એસટી બસ પણ આવતી નથી. જેના કારણે ગામની વિદ્યાર્થિનીઓને પણ શાળાએ ભણવા જવા આવવાની મુશ્કેલી પડે છે.

વડોદરા ભણવા જવું હોય તો બસ નથી
અમારે અભ્યાસ છોકરીઓમાં સૌથી ઓછો છે. આગળ ભણવા જવા માટે બસ નથી કે બીજી કોઈ સુવિધા નથી. સરકારને વિનંતી છે કે બસની સુવિધા આપે.આગળ ભણવા જવું તો કેવી રીતે જઈએ.બેટી બચાવો બેટી પઢાવો અભિયાન કાગળ ઉપર જ છે. ડભોઇ વડોદરા ભણવા જવું હોય તો કેવી રીતે જવું ? - તડવી નેહાબેન, પરવેટા

પાણી ના મળે તો એના કરતાં મરી જવું સારું
આ ગામમાં પીવાના પાણીની મોટી સમસ્યા છે. પ્રાથમિક શાળાના બોરથી પાણી લાવવું પડે છે. નદીએથી પાણી પણ લાવવું પડે છે. રાષ્ટ્રપતિને ઈચ્છામૃત્યુની અપીલ કરી છે.પાણી નહીં મળે તો એના કરતા મરી જવું સારું.આ પ્રશ્ન મેં ઉઠાવ્યો છે મારી સાથે ગામની બધી મહિલાઓએ આ પ્રશ્ન ઉઠાવશે.ગામમાં પાણીની લાઈન નથી. - ચૌહાણ હીનાબેન, પરવેટા

વારંવાર રજૂઆત છતાં કંઇ થતું નથી
અમારા ગામમાં પાણીની સમસ્યા,ગટરલાઈનની સમસ્યા છે.ચોમાસામાં પાણી ભરાઈ જાય છે.વારંવાર રજુઆત કરવા છંતા કશું થતું નથી.એટલે અમે ગ્રામજનોએ ચૂંટણી બહિષ્કાર કર્યો છે. - ખુશાલભાઈ રોહિત, પરવેટા

નેતાઓ લોલીપોપ આપી જતા રહે છે
પરવેટા બોર્ડર પરનું ગામ છે. અમારા ગામ માટે મોટી સમસ્યા પાણીની છે. પાણીની જૂની ટાંકી તોડી નંખાઈ છે. આજદિન સુધી નવી ટાંકી બની નથી. લાઈન પણ નથી. ચૂંટણી આવે ત્યારે અધિકારી નેતાઓ આવે છે અને લોલીપોપ આપીને જતા રહે છે. > જશવંતસિંહ ચંદ્રસિંહ, પરવેટા