હાલાકી:સંખેડા GIDC પાસે રસ્તાની બાજુમાં બનાવાયેલી નીકથી અકસ્માતનો ભય

સંખેડા ગામની ભાગોળે જી.આઇ.ડી.સી. નજીક ગટરના ગંદા પાણીના નિકાલ માટે પહોળી, લાંબી અને ઉંડી નીક રસ્તાની બિલકુલ જ નજીક બનાવી દેવાઇ છે. રસ્તાની લગોલગ જ નીક બનતા અકસ્માતનો ભય. ગટરના ગંદા પાણીના કારણે આસપાસ મચ્છરોનો ઉપદ્રવ, ગંદકીનો માહોલ છવાયો છે.

સંખેડા ગામની ભાગોળે સ્ટેશન રોડ ઉપર જી.આઇ.ડી.સી. નજીક જેસીબી મશીનથી એક લાબી, પહોળી અને ઉંડી નીક બનાવી દેવાઇ છે. પંચાયતે આ નીક બનાવી કે કોઇ ખાનગી ઘરમાલિકે એ તપાસનો વિષય બનેલો છે. રસ્તાની લગોલગ જ આ નીક બનેલી છે. જેના કારણે ગમખ્વાર અકસ્માત થવાની પણ શક્યતા છે. અહિયા ગંદુ પાણી નજીક રસ્તા ઉપરથી આવે છે. જેના કારણે અન્ય દુકાનદારોને પણ ગંદકીના કારણે દુર્ગંધનો સામનો કરવો પડે છે. આ બાબતે સ્થાનિક ગ્રામ પંચાયતને પણ જાણ કરવામાં આવી હોવા છતા રસ્તા પાસે ગટરના ગંદા પાણીના નિકાલ માટે કોઇ વ્યવસ્થા કરાઇ નથી. કે નથી જ્યાંથી પાણી આવે છે એમની વિરુદ્ધ પણ કોઇ કાર્યવાહી કરાઇ નથી.