કામગીરી:બહાદરપુર કપાસ ખરીદ સેન્ટર પર વાહનોની 1 કિમી લાંબી લાઈન લાગી

સંખેડા તાલુકાના બહાદરપુર ખાતે સોમવારે કપાસના વાહનો મોટી સંખ્યામાં આવી ગયા હતા. જોકે આજની ખરીદી બાદ સીસીઆઈ દ્વારા હવે તા.3થી જાન્યુઆરી સુધી ખરીદી બંધ રાખવાની જાહેરાત કરાઈ છે.

સંખેડા તાલુકાના બહાદરપુર ખાતે સોમવારે મોટી સંખ્યામાં કપાસ વેચવા માટે ખેડૂતો ઉમટી પડ્યા હતા. એક કિલોમીટર કરતાં વધારે લાંબી લાઇન લાગી હતી. જોકે સોમવારે સીસીઆઇ દ્વારા આશરે માત્ર દોઢસો ગાંસડી કપાસની ખરીદીની મર્યાદા હતી. કેટલાક ખેડૂતો વહેલી સવારથી જ અહીંયા લાઈનમાં પોતાનો કપાસ વેચવા માટે ઊભા રહી ગયા હતા.

આટલી મોટી સંખ્યામાં કપાસ વેચવા માટે ખેડૂતો ઉમટી પડેલા હોય એક વખત સી.સી.આઇ.ના અધિકારીઓ તેમજ અત્રેના કર્મચારીઓ પણ મૂંઝવણમાં મુકાઇ ગયા હતા. જોકે કપાસની ખરીદી ચાલુ રહી હતી. પણ સોમવારે કપાસ ખરીદી બાદ સીસીઆઈ દ્વારા અત્રેની કચેરીના પ્રવેશ દ્વાર પાસે એક નોટિસ ચીપકાવાઈ હતી. જેમાં જણાવ્યું હતું કે કપાસની ખરીદી તા.29 ડિસેમ્બરથી તા.3 જાન્યુઆરી સુધી બંધ રાખવામાં આવશે. એ બાદ જ બહાદરપુર સેન્ટર ખાતે કપાસની ખરીદી કરવામાં આવશે.