ચૂંટણીની તૈયારી:નસવાડીમાં 352 પ્રીસાઈડિંગ ઓફિસરોને EVMની તાલીમ આપવા સ્ટ્રોંગરૂમ ખોલાયા

નસવાડીમાં તાલુકા અને જિલ્લા પંચાયતની ચૂંટણીને લઈ નસવાડી હાઈસ્કૂલના બે સ્ટ્રોંગરૂમમાં ઈવીએમ મશીન અને બેલેટ યુનિટ મશીન મુકવામાં આવ્યા હતા. હવે જ્યારે ઈવીએમ મશીનને લગતી તાલીમ આપવાની છે ત્યારે ટ્રેનિંગ માટેના ઇવીએમને બહાર કાઢવા કામગીરી કરવામાં આવી હતી.

નસવાડી તાલુકાના 160 બુથ પર પ્રીસાઈડીગ અને આસિ. પ્રીસાઈડિંગ અધિકારીઓ ફરજ બજાવશે. જેના ભાગરૂપે નસવાડીના 176 પ્રિસાઇડિંગ અને 176 આસિસ્ટન્ટ પ્રિસાઇડિંગ અધિકારીઓ મળી કુલ 352ને તાલીમ આપવાની કામગીરી કરવામાં આવશે. નસવાડીના સ્ટ્રોંગ રૂમમાં મુકેલા ઈવીએમ મશીન છોટાઉદેપુર ડે. ડીડીઓ આનંદકુમાર ઉકાણી અને નસવાડી મામલતદાર જી આર હરદાસણી અને નસવાડી ટીડીઓ એસ જે ચૌધરી આ ત્રણે ચૂંટણી અધિકારીઓની હાજરીમાં ઈવીએમ મશીન મુકેલા સ્ટ્રોંગ રૂમના સીલ ખોલવામાં આવ્યા હતા અને તાલીમના ઈવીએમ મશીન સાથે બેલેટ યુનિટ મશીન બહાર કાઢવામાં આવ્યા હતા. સાથે સાથે બન્ને રૂમને ફરી અધિકારીની હાજરીમા સીલ કરાયા છે. નસવાડી તાલુકાની 22 તાલુકા પંચાયત અને 5 જિલ્લા પંચાયતની ચૂંટણીને લઈ તંત્ર કામગીરીમાં જોતરાઈ ગયું છે.