લોકોમાં રોષ:ફાળવેલ જગ્યાને છોડીને કવાંટના પશુ દવાખાનામાં 3 એમ્બ્યુલન્સ દેખાતાં અચરજ

કવાંટ તાલુકામાં તંત્ર દ્વારા ફરતા પશુ દવાખાનાઓ માટે ચાર એમ્બ્યુલન્સ ફાળવવામાં આવી છે. જે સવારના 7-00થી સાંજના 7-00 કલાક સુધી તેઓને સોપેલા વિસ્તારમાં ફરજ બજાવવાની હોય છે. પરંતુ તા. 2 ફેબ્રુઆરી, મંગળવારે સાંજે 5-00 કલાકે કવાંટ તાલુકા પંચાયતની બાજુમાં આવેલા પશુ દવાખાનામાં નવાલજા, બૈડીયા, મોટી ચીખલીની ત્રણ એમ્બ્યુલન્સ એક સાથે ઉભેલી જોઈ પ્રજામાં આશ્ચર્ય જોવા મળ્યું હતું.

તેઓના વી. સી. નિલેશભાઈ પટેલ સાથે વાત થતા તેઓએ જણાવ્યું હતું કે તેઓએ સવારના 7-00થી સાંજના 7-00 કલાક સુધી ફરજ બજાવવાની હોય છે. પોતાની ફરજ પરનું કામ છોડી તેઓ આવી રીતે કવાંટમાં ન આવી શકે. સરકાર દ્વારા પછાત તાલુકા અને ગામોના વિકાસ માટે લાખો રૂપિયાની ગ્રાન્ટ ફાળવી સુવિધાઓ ઉપલબ્ધ કરાવવામાં આવે છે.

પરંતુ સરકારી કર્મચારીઓ દ્વારા પોતાની કર્તવ્યનિષ્ઠ રીતે ફરજ બજાવતા ના હોય જેનાથી અંતરિયાળ વિસ્તારમાં પહોંચાડવામાં આવતી સુવિધાઓ પહોંચતી નથી. અને અપૂરતી સુવિધાઓને લઈને યોગ્ય સમયે ન મળતી સારવારને લઈને ગરીબ આદિવાસી પ્રજાને પોતાના છોકરા સમાન પશુઓ ગુમાવવાનો વારો આવી શકે છે. આવા બે જવાબદારી કર્મચારીઓ પર તંત્ર દ્વારા યોગ્ય પગલાં ભરવામાં આવે તેવી આશ પ્રજા ઝંખી રહી છે. આમ સરકાર દ્વારા લાખો રૂપિયા ખર્ચી અપાતી સેવાઓ કવાંટ તાલુકામાં ફારસ રૂપ સાબિત થવા પામી છે.